URDA fokus ngemansangka Kapit nengah SCORE
KAPIT: Pengawa mekuhka pemansang dalam kandang menua ulu di bagi menua tu nengah projek SCORE, enggau penumbuh Agensi Pembangunan Hulu Rajang (URDA).
Ditumbuh nengah Kaunsil Pemansang Koridor Pelilih ( RECODA), URDA deka mekuhka pengawa ngeyampat pemansang ba kandang menua ulu Rajang iya nya berengkah enggau projek ti bisi guna ngagai loji hidroelektrik (HEP) baka Bakun enggau Murum sereta HEP Baleh.
Sapit Kepala Menteri, Tan Sri Datuk Amar Dr James Jemut Masing ti mega Chariman URDA nerangka, ejensi baru nya deka ngiga tauka ngelala sereta lebih ngemeratka projek pemansang ke mai penguntung besai ngagai rayat ba kandang menua nya.
Nya nyengkaum lebih mekuh ngagai pengawa ngeluarka pemakai, ke alai URDA deka netapka juluk awakka orang betanam betupi ba semua kandang menua di ulu Rajang ulih nambahka asil dalm timpuh pandak enggau tengan.
Ba aum kaunsil URDA ti keterubah ditu kena Hari Dua tu tadi, Masing madahka kaunsil udah mutuska indu opis URDA deka bepalan di Kapit lalu struktur ejensi deka digaga formal enda lama agi.
Seiti ari pemutus besai digaga dalam aum iya nya ngemasukka bagi menua Kapit nyadi sebagi ari kandang menua di baruh URDA, ke diatu ti mungkur urung 4 juta hektar.
Sapit Menteri Pemansang Menua Pesisir enggau Kan- dang Nengeri, Datuk Alexander Nanta Linggi , dichirika nyadi Sapit Chairman URDA kelimpah ti ngemeratka projek pemansang infrastrutur, URDA mega patut mekuh ngagai pemansang sosioekonomi ba kandang menua ulu Rajang.
Kaban Parlimen Kapit nya ngarapka ulih numbuhka mayuh peluang ngagai rayat ba kandang menua nya, kelebih agi ba betanam betupi enggau akuakultur nengah URDA.
Kelimpah ari nya, Ketuai Pegawai Eksekutif (CEO), Tan Sri Datuk Amar Wilson Baya Dandot nerangka ngena input URDA, RECODA deka ngemudahka enggau lebih manah puku ti diperanakka ba kandang menua ulu Rajang nya.
Iya mega muji sereta ngakun pemanah pengawa ti dipejalaika pengari rayat ari kandang menua nya, ti mega bisi ngulu aum Hari Dua ke meri input sereta timbal sida dikena ngenukuka pemujur inisiatif URDA.
Kaban Kaunsil URDA ke sama bisi datai enggau baum nyengkaum Sapit Sekretari Perintah Nengeri ( Transformasyen Sosio-Ekonomi) Datu Ismawi Ismuni; Residen Kapit Joseph Belayong; Residen Bintulu Muhmamad Yakup Kari sereta pengari ari OPis Menteri Dagang temuai, Seni, Daya Idup, Nembiak enggau Lumba enggau Main; Opis Menteri Betanam Betupi Moden, Tanah Adat enggau Pemansang Kandang Mengeri enggau Sarawak Energy Berhad.
Sama bisi datai, Kaban Kunsil Nengeri ( ADUN) Katibas Datuk Ambros Blikau Enturan; Kaban Parlimen Hulu Rajang Datuk Wilson Ugak Kumbong, ADUN Pelagus Wilson Nyabong Ijang; ADUN Bukit Goram Jefferson Jamit; ADUN Murum Kennedy Chukpai Ugong; ADUN Ngemah Alexander Vincent enggau ADUN Machan Allan Siden Gramong.
Ketuai opis perintah enggau pengari ejensi perintah mega bisi datai meri penerang ngagai kaunsil URDA pasal pekara ke pemadu baru bekaul enggau pengawa pemansang ti dipejalaika ba kandang menua ulu Rajang.
Penumbuh URDA sereta Kaunsil Pemansang Tanah Tinggi ( HDA) ke asil ari runding Kepala Menteri, Datuk Amar Abang Johari Tun Openg ti mega Chairman RECODA sereta ngemendarka kededua ejensi nya maya baum Kaunsil Direktor RECODA di Kuching, bulan nyin tadi.