Program belanda ‘Wonder Woman Run 2017’ mujur matak urung 750 pesereta

KUCHING: Persatuan Perkumpulan Wanita Sarawak (PPWS)udah mujur ngatur pengawa belanda ti berambaika leka jaku ‘Wonder Woman Run 2017’ betuju ngumpul wang turu ke gerempung nya sereta deka bekunsika sekeda ari asil ke diulih nya ngagai gerempung ukai dikuasa perintah, Breast Cancer Soceity Support Group enggau Pink Ribbon Support Group.

Chairman PPWS, Norjanah Razali madah, ‘Wonder Woman Run 2017’ bepelasarka cherita, ‘ Wonder Woman’ keterubah endar diatur gerempung nya, laban orang indu ulih ngaga mayuh macham pengawa baikka nya ngagai diri sebilik, komuniti sereta menua.

“Orang indu di menua tu, ulih ngajar bala anak kita, rebak baru ngambika sida ngembuan semua ulah nya, kelebih agi dalam jeman globalisasi, lalu baka nya mega lebuh perintah nengeri ti bendar deka ngangkatka Ekonomi Digital.

“Nya alai, kitai orang indu enda tau enda nitihka singkang ubah nya, ngam- bika kitai enda kena tinggal pemansang,” ku Norjanah madah lebuh bejaku ba atur pengawa nya, tdi Komplek Kunsil Nengeri Lama, Hari Minggu nyin tadi.

Pengawa belanda ‘Wonder Woman Run 2017’ nya mega disereta urung 750 iku ke berengkah ari pukul 6 pagi, ti belanda tauka bedarat sepenyauh 3.5km enggau 5.5km

Entara pemesai bukai ke bisi ngulu program nya, bini Tuai Megai Menua (TYT) Sarawak, Toh Puan Datuk Datuk Patinggi Ragad Kurdi Taib ti mega nyadi Patron PPWS, Menteri di Opis Menteri Besai, Dato Sri Nancy Shukri enggau Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit, Datuk Fatimah Abdullah.

Kelimpah ari nya, Norjanah madah batang tuju ngatur nya dikena ngulih wang turu ungkup ‘ SFWI Care and Share’, ke dipunka patron nya empu.

Taun siti nyin mega, PPWS bisi ngaga sekeda program pengelantang pendiau kena mantu sida ke tusah sereta ngumpul wang turu ke PPWS, mantu NGO Breast Cancer Support Group, ke alai PPWS bisi nyait baju dalam palesu ke diberi ngagai pesakit riman tusu tauka dikumbai ‘Prothesis’.

Ku iya, beserimbai enggau ‘Wonder Woman Run 2017’ nya mega, iya ngelalau orang indu ke bisi nyereta program nya ngambika sama enggau nyambut Hari Orang Indu, ti berambaika jaku ‘Orang Indu dalam Lumba enggau Main’ ke deka diatur kena 26 Ogos di Palan konvensyen Borneo, Kuching (BCCK).

Ba program nya, PPWS bisi nyuaka bantu asil ari aprogram nya ngagai Sarawak Breast cancer Support Group ( RM10,000), Pink Ribbon Soceity ( RM10,000) enggau PPWS empu ( RM10,000).

Bela bisi nyukung ari sukut belanja dikena ngemujurka program nya baka, Perintah Nengeri Sarawak, Perintah Besai, Momawaters, Sarawak Energy Berhad, Serapi Garden, Pure Juicer, Lea Centre, enggau ke bukai.