Bisi 20 kompeni netapka diri masuk CMIEA 2017
KUCHING: Bisi 20 kompeni nyengkaum ke mit, tengan enggau besai di nengeri tu udah netapka diri masuk ‘ Anugerah Kecemerlangan Industri Ketua Menteri Nengeri Sarawak’ (CMIEA) 2017.
Kaban Kaunsil Direktor Perbadanan Produktiviti Malaysia (MPC) Sarawak, Datuk Abang Abdul Karim Tun Openg madahka sukung tauka sambut ari pengemeran industri manah, iya nya lebih ari 10 penyereta industri.
“Tu keterubah endar Sarawak deka meri Anugerah CMIEA ungkup pengemeran industri dagang di nengeri tu.
“Kitai ngarapka gelar ke ditumbuhka tu ila ulih ngemansang sereta meransang industri dagang ke udah bisi di nengeri tu nuju ngagai industri dagang kelas dunya.
“Nya mih seiti ari kebuah kitai numbuhka Gelar CMIEA tu, dikena nyikap pengemeran industri ti ngemeratka produktiviti,” ku iya ti mega Presiden SBF.
Iya mansutka pekara nya dalam aum pengarang berita bekaul enggau pengerami CMIEA 2017 ba MPC Sarawak ditu, kemari.
Gelar CMIEA 2017 dipejalaika Sarawak Bussiness Fedaration (SBF) bekerejasama enggau perintah nengeri, Opis Menteri Dagang Antarabansa enggau Industri (MITI) sereta MPC.
Pengerami nyuaka gelar nya deka diatur kena 8 September tu ba BCCK.
Dipelabaka, Kepala Menteri Datuk Amar Abang Johari Tun Openg deka datai bejadika sereta nyuaka gelar nya, ku iya.
“Nengah pengawa meri gelar tu kitai deka nemu chara ke pemadu manah ulih mai penyulut ngagai kompeni di Sarawak ke udah meri penguntung ngagai ekonomi nengeri,” ku iya.
Kelimpah ari nya , Direktor MPC Tengku Azmi Tengku Majid madah, proses nentu sapa bagi penyulut pesereta CMIEA 2017 bepelasarka kriteria Malaysia Business Excellence Framework (MBEF) iya nya kriteria ke sama dikena dalam ‘Anugerah Kecemerlangan Industri’ (AKI).
“Tetiap penyereta deka pulai nyadi pemenang, kitai deka meri poin bepelasarka skor lalu tetiap kategori deka dipilih nerima gelar Emas, Perak enggau Gangsa,” ku iya seraya madahka bisi tiga iku juri.
Nitih ku Tengku Azmi bisi 20 penyereta diterima ti nyengkaum tiga kompeni ari kategori dagang mit; tujuh kompeni dalam kategori dagang tengan pemesai enggau 10 kompeni dalam kategori dagang besai.
Gelar CMIEA nya deka diatur dua kali setaun lalu penerima gelar deka ngarika Sarawak ngagai renggat pperintah besai iya nya AKI ke dipejalaika MITI.
Sama bisi datai ba aum pengarang berita nya, Ahli Majlis SBF Alvin Sia, Sekeretari Agunf SBF Johnathan Chai enggau Komiti Pengatur CMIEA 2017, Rodger Chan.