Konferen ICSE 2017 Ke-2 mujur matak 650 iku pesereta

KUCHING: Konferen tiga hari Aum Entarabansa Pendidikan Khas (ICSE 2017) Ke2 ti diatur SEAMEO Regional Centre for Special Education disukung Opis Menteri Pelajar Malaysia (KPM) enggau Perintah Nengeri Sarawak, ari 31 Julai nyentuk 2 Ogos mujur matak urung 650 pesereta ari lebih 30 buah menua ari serata dunya.

Ba konferen nya, urung 101 keretas kereja, bisi dibantaika 121 pengajar enggau ke bepengelandik ari menua ASEAN enggau serata udah mujur ngaga lima resolusyen ti dibacha Direktor, SEAMEO Regional Centre for Special Education, Datin Dr. Yasmin Hussain.

“Pekara pelajar disengkaum ungkup semua nembiak, laban pelajar tu baka penumbuh, basa sereta nerima, lalu SEAMEO ngemeratka tujuh pekara nitihka Artikel 24 ‘United Nation’s Convention of the Rights of Persons with Disabilities and the Education Agenda of 2030 Sustaainable Development Goals 4’ ti enda tau enda dititihka tetiap renggat nyengkaum perintah ngambika sida sama ulih ngasaika pengelantang baka nembiak bukai.

“Apai indai enggau komuniti enda tau enda diberi penemu pasal nembiak ke timpang pendiau, enda tau diseliah ari pelajar, ngambi ulih ngurangka diskriminasi sereta prejudis dalam komuniti.

“Semua Pelajar bekaul enggau Teknikal sereta Vokasional, Pengawa Latih, Inovasyen enggau ICT perengka guna ke berat, reti nya nembiak ke timpang pendiau pan sama enggau ngulihka pelajar tu, ngambika jemah ila meri pengelantang ngagai pendiau sida jemah ila.

Ba pekara pasal timpang pendiau pekara ke tu patut dikemerat tetiap iku kitai, lalu penemu tu sebagi ari penemu enggau pemereti ati ti enda tau enda dikunsi enggau tetiap serak komuniti,” ku Yasmin.

Sama bisi enggau ngulu atur pengawa nya, Menteri Pelajar Malaysia, Dato Seri Mahadzir Khalid, Menteri Pelajar, Sains enggau Pansik Teknologi, Dato Sri Michael Manyin anak Jawong, enggau Sapit Direktor Sekretariat SEAMEO, Prasert Tepanart.