SKM napi penanggul dalam subjek Sains, Matematik
Ketegal kurang pengajar ‘pakar’ dalam kededua subjek tu kelimpah enda chukup infrastruktur
KUCHING: Kurang pengajar ‘pakar’ dalam subjek Sains enggau Matematik entara kebuah ti ngasuh Sekula Kurang Nembiak (SKM) enda nyulut dalam kededua subjek tu. Kelimpah ari nya, infrastruktur sereta perengka guna pemun ke enda chukup mega meri pangka negatif dalam pemutus peresa bala nembiak di SKM.
Menteri Pelajar, Sains enggau Pansik Teknologi Dato Sri Michael Manyin anak Jawong madah, pengurang pengajar ti endang landik dalam sekeda subjek iya nya ambika chunto ngena pengajar subjek Jaku Melayu ngajar subjek Matematik tauka Sains.
“Pengelandik ngajar sereta belajar (P&P) subjek Sains enggau Matematik, enda tau enda bepun ari tikas ti pemaduh baruh iya nya Primari Satu lalu ukai nyau nganti udah di Pom Satu.
“Nya kebuah mayuh nembiak sekula kitai ke diau di kandang menua pesisir enda bepengelandik dalam subjek tu laban enda diterenak enggau runding ti angkunka subjek Saing enggau Matematik kenyau ari Primari Satu.
“Bisi pansik ke digaga raban profesional madahka enti nembiak diajar chara ke salah ( dalam subjek Matematik enggau Sains) dalam timpuh 2 ngagai 3 taun, nembiak nya ila pedis deka masuk ngagai Palan Pelajar Tinggi (IPT),” ku iya.
Manyin madah munyi tu lebuh bejaku ba aum media pengudah nguluka Menteri Pelajar Malaysia Dato Seri Mahadzir Khalid nutup atur pengawa Konferen Entarabansa bekait enggau Pelajar Khas (ICSE 2017) ke-2 di Palan Aum Borneo Kuching (BCCK), ditu, kilah ensana.
Ku iya nambah, bekaul enggau pekara sekula ti enda chukup nembiak tauka SKM tu, Opis Pelajar Sarawak (JPNS) bisi udah ngaga aum tauka wokshop dua hari dikena beratika pekara tu. Lalu nengah pansik nya, sekula ti kurang ari 150 iku nembiak bisi 651 buah sekula sereta kurang ari 300 iku nembiak iya nya bisi 1,004 buah sekula.
“Rambau aum nya bisi udah dipejurai minta sekula kategori SKM digempung enggau sekula bukai, lalu nutup SKM tu, tang penang- gul ke besai ti ditapi JPNS iya nya mayuh apai indai enda besetuju.
“Kami enda ngansak… Nya kebuah kami deka ngaga pengawa pemandang bulan tu, lalu program tu dipejalai dalam kandang dua bulan tu ila, dikena meri penemu ngagai apai indai ngambika sida ulih berunding enggau manah,” ku iya.
Berindik ari nya, Manyin madah seagi-agi sekula nya mit, bala nembiak ke dalam kategori SKM enda ulih nyapai penyulut dalam sekula nya laban agi tinggal ari sukut infrastruktur, kelimpah ari nembiak sekula pan enda ransing besemekih enggau positif.
“Kekadang bala nembiak baruh SKM tu lebuh pulai ari sekula, gaga endar ati madah ngagai apai indai sida iya bulih lumur dua (2), tang mih lumur 2 nya ari dua iku nembiak dalam seiti kelas. KPM pan enda ulih nganjung pengajar ke pakar ngajar di sekula nya laban sekula kelalu mit.
“Nya kebuah kami deka ngaga pengawa pemandang, madah ngagai apai indai berunding panjai ari sida iya gaga meda pemutus anak sida iya,” ku Manyin.
Ba pekara nya mega, Menteri Pelajar Malaysia Dato Seri Mahadzir Khalid madah, KPM enggau kerejasama opis menteri pelajar Sarawak, ba pemungkal ngaga makmal aum tu iya nya dikena mansik ni bagi sekula ke dalam kategori SKM.
“Atur nangkanka tu ila, iya nya ngaga inisiatif ngaga pengawa pemandang, betemu enggau Gerempung Apai Indai enggau Pengajar (PIBG), Gerempung Ukai Dikuasa Perintah ( NGO) sereta tuai-tuai pupu bansa meri penemu sida lalu nyapai pemutus ti pulaika pemaik ngagai sida,” ku iya.
Pengelandik ngajar sereta belajar (P&P) subjek Sains enggau Matematik, enda tau enda bepun ari tikas ti pemaduh baruh iya nya Primari Satu lalu ukai nyau nganti udah di Pom Satu. Dato Sri Michael Manyin anak Jawong Menteri Pelajar, Sains enggau Pansik Teknologi