KGS mujur ngerintai komiti baru rambau AGM ti kedua
KUCHING: Pengajar Suda Lunyong iya nya pesereta indu tunggal dalam kategori Tebuka Baruh 45 taun dalam Pekit Pidato Iban UB-Aedil 2017 ti keterubah lalu iya chukup gaga ati deka sama besemekih ba pekit renggat final ti deka datai.
Iya begulai enggau 6 iku pesereta lelaki ke bukai deka bepekit ba renggat final iya nya kena 5 Ogos (pagila) ti bepalan ba Auditorium Tun Ahmad Zaidi Adruce (TAZA) di Palan Pematih Pengajar (IPG) Batu Lintang.
“Aku berasai ransing tang pia mega kesal laban aku seiku aja pesereta indu dalam kategori Tebuka Baruh 45 taun nyereta pekit ti keterubah digaga tu – Pekit Pidato Iban,” ku iya lebuh dikerandau pengarang berita kemari.
Penatai asal ari Rumah Bihai, Baoh Burak di sitak Dalat, Suda, 25 taun, iya nya seiku graduet dalam Degree ba Pelajar Jaku Iban ari IPG kampus Rajang. Lalu ke diatu iya ngajar Jaku Iban di Sekula Primari (SK) Nanga Ngungun, Kanowit.
Suda mega ngelalau mensia mayuh ke bukai sama datai ngulu program ti besejarah tu pagila ti berengkah ari pukul 8 pagi.
“Aku deka minta mensia mayuh kelebih agi orang indu datai meri peransang ngagai aku lalu sama meri sukung ngagai pekit ti keterubah digaga tu kena Hari Enam tu (pagila).
Pia mega aku minta NGO ke bukai baka raban Gerempung Bansa Dayak Sarawak (SDNU), Serakup Indu Dayak Ssarawak (SIDS) enggau SADIA bela ulih ngelimpangka diri ngagai Auditorium TAZA di IPG Batu Lintang,” ku Suda.
Suda deka besemekih enggau enam iku pesereta lelaki ke bukai iya nya Martin Dinil, Tini Numpang, Sila Robin, Bruwin Jumput, Larry Dabong enggau Sangin Juat.
Kelimpah ari kategori Tebuka Baruh 45 taun, ketegori Palan Pelajar Tinggi (IPT) mega bisi tujuh iku pesereta iya ti udah ngenukuka diri sama datai iya nya Rynna Sha’erra Mindew, Micheal Bandang Tinggai, Brolin Golayous, Easter Wendy Ngalit Lawrance, Erica Leenya Eben, Nicholas Beliang Engkabi enggau Easter Jawai Paul.
Lalu bisi 27 iku pesereta dalam kategori Nembiak Sekula ari sepuluh buah sekula sekondari selampur nengeri tu udah nganjung penyereta. Semua sida tu deka besemekih dalam renggat keterubah dulu, iya nya deka digaga pukul 1 ngalih ari saritu di Hotel Kingwood, Jalai Padungan ditu, dikena milih enam iku pesereta ti deka bepekit dalam renggat final pagila.
Ba kenang ke bukai, temuai dipebasa iya nya Sapit Kepala Menteri Tan Sri Datuk Amar Dr James Jemut Masing bedau lama bisi madahka Pekit Pidato Iban 2017 tu iya nya entara pekit ti besejarah ketegal tu ti keterubah diatur ba renggat nengeri Sarawak.
Gerempung Ukai Dikuasa Perintah (NGO) ti ngatur pekit tu iya nya Utusan Borneo (UB) begulai enggau Gerempung Pemansang Pelajar Jaku Iban (AEDIL) ngarapka semua pesereta ti datai bepekit tu ukai ari pejal piak bukai, tang ari pengeranda diri empu ti deka sama ngetanka Jaku Iban ngambika atur pengawa tu mujur. KAPIT: Kelab Gagung Sibu Sarawak (KGS) udah ngatur Aum Besai Ninting Taun (AGM) kedua di Hotel Li Hua, bedau lama tu tadi.
Chairman KGS, Jabang Juntan, ti ngetuaika aum madahka tuju aum nya ukai dikena milih komiti ke baru.
“Aum tu nerima ripot aktiviti kelab ari sekretari enggau ripot belanja ari tukang wang seraya bejuraika perambu enggau aktiviti ti deka diatur ungkup kelab. Aum ungkup pengawa milih komiti baru deka diatur dalam taun 2018 ila,” ku Jabang.
Iya berasai gaga meda semua isu dalam kelab teputar memanah lalu tu nyaup ngenegapka agi nama kelab ngambika seruran mansang dataika jemah.
“Kitai udah nyadi raban pemungkal ti nyaga pekayan asal kitai lalu mai rebak baru nampung pengawa nentuka kelab tu seruran mansang sereta semampai setipak enggau jeman. Tuju kitai deka ngelakuka main asal enggau pekayan kitai,” ku Jabang nyemetak.
Aum nya mega bisi mantaika sekeda perambu baru nyadi lalau ungkup bala kaban kelab. Isu bukai nyengkaum numbuhka ‘Facebook’ tauka website ungkup kelab.
Sekeda batang tuju KGS ditumbuh iya nya ngintu pekayan asal bujang berani Iban tauka Gagung nyengkaum Ketapu Silong tauak Lelanjang.
Naka diatu, bisi 116 iku udah rejista nyadi kaban, tebal agi nyadi kaban seumur idup, datai ari mayuh pelilih menua di serata nengeri. Dua iku kaban dipebasa iya nya Sapit Menteri Pemansang Menua Pesisir enggau Kandang Menua ke mega Kaban Parlimen (MP) Datuk Alexander Nanta Linggi enggau MP Kanowit Datuk Aaron Dagang, 91 iku kaban seumur idup, 22 kaban serakup (indu) lalu seiku kaban nembiak.
Sama bisi datai Sapit Chairman Patros Tandang, Sekretari Martin Bilun, Penulung Tukang Wang Samuel Albert Tegap, Ketuai Pemadah Favian Masing Lintang, bala kaban exco Sammy Ngelambai, Johny Sain sereta 23 iku kaban ke bukai.