Program RPL nentuka pekereja profesional bisi setipikit pengelandik
KUCHING: Pekereja profesional ti bepeneleba enggau udah lama gawa dalam industri sida empu tang bedau ngembuan setipikit tau masuk program Pengiktirafan Pencapaian Terdahulu (RPL) ke diatu benung dikerembai di Sarawak.
Ketuai Direktor Opis Pemansang Pengelandik (JPK), Opis Menteri Orang Gawa, Nidzam Kamarulzaman madah, program nya tebuka ngagai sida ti udah lama gawa dalam industri tang bedau ngembuan sebarang setipikit dikena ngenukuka pengelandik sida.
“Tu pengawa perintah nengeri begulai enggau JPK ke alai kitai meri peluang ngagai pekereja profesional ti udah lama gawa dalam industri tang bedau ngembuan setipikit ari pelajar formal.
“Kitai bisi program RPL, ke alai sida ti nadai ngembuan setipikit tu tau ngulihka setipikit ari JPK bepelasarka peneleba sida,” ku iya rambau aum pengarang berita ke mega digulu Menteri Pelajar, Sains dan Pemansik Teknologi, Dato Sri Michael Manyin Jawong ditu, kilah ensana.
Nidzam madah program nya udah dipejalai di Semenanjung lalu diatu dikerembai di Sarawak.
Iya nyemetak madah, tu deka mai pemaik ngagau mayuh agi pekereja profesional deka nerima setipikit kelebih agi dalam bidang pengelandik.
“Tu pengawa ti beguna endar dipejalaika JPK ari baruh Opis Menteri Orang Gawa begulai enggau perintah nengeri nengah Opis Menteri Pelajar, Sains enggau Pemansik Teknologi,” ku iya.
Iya madah ba pekara sida ti tau masuk program ke udah bekereja lebih ari lima taun enggau lama agi sebedau diserenih.
Ba lansa ke bukai, ku Manyin, opis menteri iya deka bejalaika pengawa tu begulai enggau JPK sereta endang nerima manah pengawa ti dipejalaika nya.
“Kitai bisi mayuh orang gawa landik ti udah lama gawa sereta bisi penyulut ba pengawa sida tang nadai setipikit.
“Nya alai, kitai endang gaga amat lebuh JPK sedia nyediaka setipikit tu ngagai sida bekaul nengah program nya,” ku iya.
Taja pia ku iya, semua atur enggau sida ke tau masuk program tu deka ditentuka piak JPK.
Manyin ngelaluka sida ti ulih masuk program datai ke mua ngulhka setipikit sida nengah program RPL nya.