K1M patut regas nyaup ningkah jaku petenah ditabur piak ti beambi ulih
BINTULU: Komuniti 1Malaysia (K1M) patut regas bejalaika pangku pengawa nyadi komuniti besai nyaup nulak jaku petenah, ajum sereta isu ngaul pekara raban bansa ti ditabur sereta dibantaika piak ti sengaja beambi ulih.
Kaban Parlimen ( MP) Bintulu, Datuk Seri Tiong King Sing madahka pangku pengawa besai K1M iya nya nulak isu dibantai ti tau ngasuh charut dalam komuniti sereta patut naburka penerang enggau pekara ti betul bekaul komiti.
Ku iya, pengawa naburka bemacham penerang ba media rama ukai pekara baru lalu ukai mega isu lama dipejurai tang dalam komuniti patut nyerenih pengamat penerang ti diterima.
“Nya kebuah K1M patut gawa beripih agi ngambika ditunda rebak baru,” ku iya dalam teks jaku ti dibacha Pemesai Khas iya, Azman Abdul Rahman, rambau bejadika Program Negaraku @ Komuniti Renggat K1M Sebezau di Begunan Komiti Pemansang enggau Pengelikun Genturung Pendiau(JKKK) Kampung Baru, apin lama ke udah.
Ku iya, lebih 30 bansa ke bisi di Sarawak, kitai temegah enggau penyerakup seruran dijaga dataika mayuh peranak dunya deka nemu nama formula ketuai nengeri enggau menua tu ngempung bansa ke bisi.
“Pekara tu semina ulih disaut peranak nengeri enggau menua tu empu kelebih agi bekaul enggau pekara penyerakup ti dikemeran sereta nyadi tulang belakang ba pengelantang,” ku iya.
Pengelikun ti diasai ngelama tu mega ku iya, peranak Malaysia patut ngenang diri idup di Malaysia ti likun, nejuka sebarang bida sereta patut ngembuan ulah proaktif.
Nangkan nya, semangat Negaraku nempa pemanah ulah dalam komuniti nadai ngira bansa enggau ideologi.
Bala ketuai Malaysia nengah K1M nyadi sebengkah raban volunteer ari baruh kemata Opis Pemadah Malaysia diatu manggai 1,500 buah di serata menua.
Ku iya, enam pemerat bidang besai ti dikemerat iya nya Rakan Padu, Rakan Dagang, Rakan IT (Teknologi Pemadah), Rakan Main Asal, Rakan Pengelantang enggau Rakan Volunteer nempa K1M gawa berurun agi, sepenemu, bebatak asur kelimpah ngetanka gaya pendiau di menua tu ditunda rebak dudi hari.
Berebak enggau nya, Chairman K1M Sebezau, Ali Sabri Saber Ali Khan madahka, taja program diatur nya mit tang ngemai reti chukup besai ngempung peranak di menua nya nadai ngira asal penatai enggau jalai pengarap.
Ku iya, program tu udah dikalih baru nama deka meri reti sereta matak peranak menua tu ngaul sereta nyereta aktiviti ti diatur pulaika pemansang enggau penyerakup.
Sekeda ari aktiviti ke bisi diatur baka licha talukka menua ti bejuraika senentang ‘Meretika Rukun Negara’ dikenataika Rosnani Mohdar ari Opis Pemadah Malaysia Bintulu enggau ‘ Mutarka Penanggul Kusut Runding’ ulih Jurupulih Perubat Chara kereja Opis Pengerai Bagi Menua Bintulu, Medeline Susie Sumping ti ngemeratka pengawa nyaga pengerai untak.