Bala tuai rumah agi keranka Nyalau ngetan penuduk Parlimen Lubok Antu
SKRANG: “Kami semina deka Datuk Nyalau ngetanka penuduk Parlimen Lubok Antu lalu nulak sebarang chalun bukai lebih agi chalun ari luar menua tu ngarika kami ditu”.
“Ukai reti pengundi ba sitak Batang Ai Ili, Skrang udah leju lalu nulak Barisan Nasional (BN) tang kebendar kami semina nulak chalun bidang ‘terejun’ ngarika kami ungkup lima taun ke deka datai”.
Munyi nya ku jaku tangkan Tuai Rumah Imau Sudin ti ngarika 27 tuai rumah ba menua Batang Ai Ili, Skrang dia pasal bisi berita ngerimbas pending madahka chalun bukai deka nukar pengari rayat kediatu Datuk William Nyalau Badak ba Pengawa Bepilih Besai (PRU14) tu ila nyerumba pengerami bejadika Atap sereta Ngiling Bidai ba Tanjong Batang Ai, Skrang ensanus.
Kenu ku iya, sida udah leju ninga berita selebubu ngapa madahka Nyalau deka ditingkil lalu ditukar enggau chalun bukai ke disebut lebih bika sereta mayuh agi penemu ke baru.
“Awakka serak tu kami beterus terang iya nya kami enggai Nyalau ditukar abis nadai beri peluang ngagai iya sepenggal agi laban servis iya ditu chukup manah sekumbang megai penuduk Lubok Antu.
“Iya seiku ketuai ti bagas ngabas rayat, tampak rita sereta sekaki pengawa enggau ADUN kami iya nya Dr Rayong...(ADUN Engkilili) nyadi nadai kebuah iya ditukar,” ku iya bejaku ba mua urung 2,000 temuai ke datai ba pengerami nya.
Kenu ku Imau, bala ketuai raban bansa ditu udah berandau sereta sepenemu keranka ketuai tinggi parti ngasurka nama Nyalau ung- kup sepenggal agi.
“Kami ukai reti ngelaban penemu lebih agi pengari kami iya nya Dr Rayong laban semua pemansang sereta geran ke diterima endang datai ari perintah. Tang kami nulak chalun bukai enti ukai Nyalau bediri ba penuduk Parlimen Lubok Antu,” ku iya.
Tambah mega, diatu Batang Ai Ili chukup mansang lalu mayuh projek benung dipejalai ke pemai rayat asil pengawa Dr Dr Rayong enggau Nyalau.
“Diatu, mayuh rumah panjai ditu udah bulih bekal kuasa karan 24 jam kelimpah ari sistem jalai raya dibanding suba asaika bemimpi ba sianh hari.
“Taja pia engka deka nyeraraka dua iku pengari rayat tu ke chukup regas ngabas lalu nguji mutarka penanggul kami?, ku tanya iya seraya madah chalun bukai semina baka ‘nyayat diri’ nyema deka terus ngelaban Nyalau ila.
Sama bisi datai kaban Parlimen Lubuk Antu Datuk William Nyalau Badak, ADUN Engkilili Dr Johnical Rayong Ngipa, pemesai JASA Engkilili Edwin Anchih, pemantu Khas Nyalau kaunselor Zaini Aji, Penghulu Gerang Anchih, pengari parti serakup BN, bala ketuai opis perintah, ketuai raban bansa enggau ke bukai.