Gagit deka bulih bantu E-Kasih, seiku orang tuai rugi RM1,530

SARIKEI: Ketegal gagit deka bulih bantu E-Kasih, seiku orang tuai nyau rugi urung RM1,530 pengudah dipelaba alah tipu dua iku lelaki enggau seiku indu, ensana.

Penusah nyadi pukul 8.50 pagi, maya indu ke beumur 60 taun ari Sungai Selidap, Sarikei dilawa dua iku lelaki enggau seiku indu ba terminal bas di Jalai Wharf.

Ketuai Polis Pelilih (KPD) Sarikei, Superintenden Mat Jusoh Mohamad madah, maya nya, dua iku lelaki enggau seiku indu nya madah deka mantu orang tuai tu ngerejista diri ba E-Kasih.

“Udah nya, orang tuai nya dipinta nitihka sida nepan sebuah kerita nuju opis perintah ba Wisma Jubli Mutiara.

“Maya ba rantau jalai, orang tuai nya dipinta muka semua barang berega lalu ditinggal ba dalam kerita. Pengudah datai ba begunan Wisma Jubli Mutiara, orang tuai nya diasuh nurun ungkup pengawa udah nya.

“Orang tuai nya nitih aja padah sida lalu pengudau tembu pengawa orang tuai nya datai baru ngelawa palan paking kerita lalu meda kerita ke ditepan begulai enggau dua lelaki enggau seiku indu nadai agi diak,” ku iya madah nengah sebengkah penerang nuju media, kemari.

Berindik ari penyadi nya, orang tuai nya madah diri lenyau seiti marik, tinchin, chek Bank Simpan Nasional (BSN) penyampau RM600.00, kad ATM BSN enggau duit RM30.

Nitihku Mat Jusoh, maya dirandau polis, orang tuai nya madah diri enda ngelala dua iku lelaki enggau indu nya.

“Kes tu agi dipansik lalu kami deka bebendar nyidi saspek ke bekaul,’ ku iya.

Udah nya, ba sebengkah agi kes ba endur bukai, dua lelaki beumur 16 enggau 41 taun ditan laban ditemu positif dadah.

“Maya kami bejalaika pengawa meresa ai kemi ba dua iku lelaki ke gawa nyadi tukang nyual barang enggau berikan nya ba Balai Polis Pusat Sarikei, sida ditemu positif dadah.

“Nya kebuah, kedua-dua lelaki nya udah ditan lalu dipansik nitihka Seksyen 15 (1)(a) Akta Dadah Berbahaya (ADB) 1952,” ku Mat Jusoh.