UPP seruran bebasaka pemutus BN
Nya alai parti tu enda kakang meri sukung ngagai sebarang chalun BN
KUCHING: Parti Rakyat Bersatu ( UPP) seruran nyukung semangat Barisan Nasional (BN) taja empai lama ke udah bisi nerantangka nama chalun ti ulih menang ba menua tengah Sarawak ngagai ketuai tinggi BN.
Ketuai Nembiak UPP, Dr Johnical Rayong Ngipa madah parti nya semina nerantangka nama chalun ke bisi peluang besai menang lalu nangkan nya ketuai tinggi BN deka nentuka pemutus.“UPP bebasaka genap pemutus ke digaga ketuai tinggi BN lalu sigi enda kakang meri sukung penuh ngagai sebarang chalun BN,” ku lebuh nimbal penerang dipansutka Chairman Parti Sa’ati Rayat Sarawak (SUPP) Pampang Bawang Assan Robert Lau ti madahka UPP enda ulih nerantangka nama chalun ngagai BN laban sida ukai parti serakup BN.
Nitihku Kaban Kunsil Nengeri (ADUN) Engkilili nya mega, iya enda setuju eng- gau Lau lalu ngarapka SUPP nunda UPP ke udah ngelancharka perambu pemansang ungkup Sibu.
“Diatu ukai maya iya SUPP kiruh belaya jaku enggau UPP,” ku iya.
Iya madah ex- Kepala Menteri niang Datuk Patinggi Tan Sri Adenan Satem udah madahka chalun ari UPP nyadi chalun terus BN lalu lima ari sida menang ba Pengawa Bepilih Besai Nengeri kena Mei taun nyin kemari.
Kenu ku iya, tu patut meri kelai terang iya nya Perintah Nengeri Sarawak endang ngaku pengawa UPP.
Iya madah, mengeri Sibu begunaka perambu ti manah ngambika terus maju lalu UPP udah nerantangka nama chalun ke engkeman dikena mantu nentuka ‘Perambu Pemansang Lima Taun Ungkup Sibu’ digaga parti ulih mujur.
Iya madah perambu pemansang UPP ungkup Sibu mega mandangka pengeran UPP ti siru ngemansangka rayat Sarawak.
“Diatu, empai temu kemaya Pengawa Bepilih Besai Ke-14 (PRU14) diatur. Tang UPP udah ngelih parti bukai mantaika nama chalun ke dikeandal menang.
“Tu mandangka UPP ngemeratka pasal pemansang enggau pemaik Sibu dudi hari laban nya jauh lebih beguna ari pemaik parti,” ku Dr Rayong.
Nya alai, iya ngarapka SUPP badu ngena UPP dikena ngiarka sukung rayat.
Iya madah SUPP Wilayah Tengah bisi lima pampang lalu sida patut bebendar agi bejalaika pengawa ungkup rayat Sibu lalu ukai masau jam bejai UPP.
“Aku deka meda SUPP mantaika perambu ungkup Sibu. Nyadi ukai ulah ke pintar enti sida bekelikuhka perambu lima taun ke ditempa kami ungkup Sibu,” ku iya.
Apin lama ke udah, UPP bisi mantaika nama chalun bepenau iya nya Datuk Andrew Wong ungkup Sibu enggau Ting Kee Nguan ungkup Lanang.
Parti tu nerantangka nama Wong enggau Ting ngagai Chairman BN Besai Datuk Seri Najib Tun Razak Chairman BN Nengeri Datuk Amar Abang Johari Tun Abang Openg.
Maya Presiden UPP Dato Sri Wong Soon Koh mantaika nama chalun nya, iya madah, tu endang bidang kuasa ketuai tinggi BN milih lalu UPP nerantangka nama chalun ke dikeandal ulih menang.
Iya mega ngelalau partiparti politik enda ibuh belaya enggau pangan diri, laban pemutus ke nyemetak deka digaga ketuai tinggi BN.
Wong madah, parti ngiga chalun ke pemadu manah lalu numpu ngagai pengawa ngulihka pengarap rayat ngagai BN.
UPP bebasaka genap pemutus ke digaga ketuai tinggi BN lalu sigi enda kakang meri sukung penuh ngagai sebarang chalun BN. Dr Johnical Rayong Ngipa Ketuai Nembiak UPP