Baru: Hak pengeraja asal nengeri tu meseti diambi pulai ari perintah besai
KUCHING: Chairman Parti Keadilan Rakyat ( PKR) Sarawak, Baru Bian minta perintah nengeri enda tau enda nyemetak minta ungkup tauka hak Sarawak bekaul enggau pengeraja asal ari perintah besai.
“Perintah Sarawak enda tau enda nyemetak minta ungkup tauka hak Sarawak ba pengeraja asal enggau penyereta dalam industri minyak enggau gis (O&G).
“Pengerugi ketegal pemutus puku ke enda manah ke diputuska pengaga pemutus maya ba Twin Towers enda patut nyadi baru. Kami minta Petronas meri semua penerang pasal duit ke lenyau dalam projek tu,” ku iya.
Baru ke nyadi Kaban Kunsil Nengeri ( ADUN) Ba’kelalan, dalam aum pengarang berita ke diatur ba Indu Opis PKR ditu kemari mansutka pekara nya lebuh ke ngenang pasal Petronas ke nginsil projek LNG di Kanada.
Iya madahka berita pasal projek nya ti dikinsil endang ngenyitka sereta enda ngelantang ati, ti enda dikemerat, nadai betanya enggau penerang.
“Utai ke nyadi nya semina pasal pengurang Malaysia - bisi pengurang ba pengelanchat, atur belanja enggau pengelurus. Nya kebuah kami minta Petronas bejalaika tanggungpengawa ngagai Parlimen lalu ukai ngagai menteri besai.
“Duit ke dibasau ngagai projek menua tasik nya duit rayat ti tebal agi datai ari pengeraja asal Sabah enggau Sarawak. Patut bisi berasai tanggungpengawa ari Lembaga Petronas ari penerang pandak ke dikeluarka minggu nyin kemari,” ku iya.
Di Alberta, Petronas hari Tiga ngemutuska enda neruska perambu projek LNG di Kanada Barat ti berega C$36 billion (RM123.3 billion), ketegal rega minyak renggat dunya LNG ti baruh tauka lembut.
Kelimpah ari nya dalam aum pengarang berita ke sama, Kaban Kunsil Nengeri (ADUN) Batu Lintang See Chee How madahka perintah nengeri patut minta penerang silik ari Petronas bekaul enggau pengawa muai 10 peratus dalam Petronas LNG9 Sdn Bhd ke ngembuan projek MLNG Train 9 ngagai kompeni minyak Thailand sereta kerejasama PTTGL Investement Ltd ( PTTGLI) sepenyampau US$ 500 million ( RM2.14 billion).
See madahka Kepala Menteri Datuk Amar Abang Johari Tun Openg patut meri timpuh 30 hari ngagai Petronas nyimpul Shareholders Agreement enggau Sarawak pasal 10 peratus ekuiti sama enggau projek MLNG Train 9.
“Pengereja Pengawa Opis perintah nengeri lebih agi Sekretari Perintah Nengeri ke nyadi Komiti Direktor dalam Petronas, berutang penerang enggau peranak Sarawak nama kebuah ngambi timpuh ke lama nyimpul semaya enggau petronas pasal 10 peratus saham ekuiti dalam projek MLNG di Bintulu.
“Atur nya digaga Petronas dalam bulan Ogos 2014 sereta tekalanya diterima Kepala Menteri kitai niang Datuk Patinggi Tan Sri Adenan Satem, tang tiga taun, utai ke diulih Sarawak lalu bedau ditetapka,” ku iya.