KGBS arapka kurikulum VC terus dikemanah ke pemaik menua
KUCHING: Gerempung Pengajar Bumiputera Sarawak (KGBS) ngarapka kurikulum Kolej Vokasional (VC) ulih terus dikemanah sereta ditegapka agi awakka ulih ngasilka produk tauka nempa nembiak ti meri empas tauka bekualiti tinggi ngagai menua.
Presiden iya, Ahmad Malie madahka, nya dikena nyeliah sereta madamka runding enda tentu arapka pelajar pengelandik ba raban bansa lebih agi apai indai.
Iya madahka diri temegah ati sereta meri pengaga ati ngagai semua nembiak VC ke udah dikangau gawa nitihka pengelandik pelajar sida pengudah tembu belajar.
“KGBS ngarapka kurikulum VC dikemanah sereta ditegapka agi dikena nyeliahka runding tauka penemu raban bansa lebih agi apai indai ti enda tentu arapka pengulih pengelandik nembiak ke nyadi produk ti ditempa VC.
“KGBS meri pengaga ati ngagai semua nembiak VC laban ke udah ditawarkan pengawa nitihka pengelandik ke dipelajar pengudah tembu belajar. Tu ngayanka juluk perintah nengah VC udah nyadi nyata.
“Berindik ari pekara nya, pengakang penemu tauka runding bala apai indai ngagai pengulih VC nyadi institusyen pengeluar pengereja pengawa bepengelandik udah ulih disangkal,” ku iya madah ngagai Utusan Borneo.
Ahmad meri mansutka pen- erang nya lebuh ke ngenang pasal urung 90 peratus ari 2,273 iku nembiak VC raban keterubah ke tembu belajar taun nyin kemari udah bulih pengawa dalam bidang pengelandik sida, ti lalu ngayanka asil VC bisi peminta tinggi ba market pengawa sereta diaku industri.
KGBS meri puji ngagai Opis Menteri Pelajar Ma- laysia (KPM) laban ke udah mujur ngelangkar program VC ti meri empas tinggi nya sereta ngarapka raban bansa terus pechaya sereta bisi pengarap ati ngagai VC ulih modal mensia bepengelandik tinggi.
“KGBS ngarapka modal mensia ke udah ditempa nengah penumbuh VC tu ulih mai transformasi menua nuju TN50 jemah ila,” ku Ahmad.
Apin lama ba Dewan Rakyat, Menteri Pelajar Datuk Seri Mahdzir Khalid madahka raban kedua, 41.74 peratus ari 12,997 nembiak VC udah dikangau gawa taja pan sida bedau konvokesyen.
“Tu ngayanka nembiak VC ngembuan pengelandik sereta diaku industri,” ku iya.