Lebih 200 iku ukui bisi dituchuk vaksin rabies di Balai Komuniti Siburan kemari

KUCHING: Piak bekuasa terus bejalaika pengawa nuchuk vaksin dikena nagang igi penyakit rabies tauka ukui gila ngelekai ditu.

Sebengkah pengawa nuchuk vaksin udah dipejalai di Balai Komuniti Siburan ngagai jelu inang di kandang menua Siburan, Beratok enggau Tapah, enggau seiku pekebun buah di Tapah ngemai 14 iku ukui diinang iya ngambika dituchuk vaksin.

Berindik ari gaya ukui tau endar nganu sereta siga, pengempu ukui nikal baru ngambi sangkar endur ngurung ukai ngambika sida ulih bejalaika pengawa.

Urung pukul 11.15 pagi bisi 244 iku ukui udah dituchuk vaksin rambau atur program di balai nya, ti tembu urung pukul 4 lemai.

Penghulu Raban Bansa China di kandang menua Siburan, Beratok enggau Tapah, Voon Min Sen, ke mega bisi datai ngemataka pengawa meri vaksin tu, muji pengawa ti dipejalaika perintah dikena nagang pengelekai rabies.

“Aku berasai lantang endar meda piak bekuasa bejalaika pengawa meri vaksin di Siburan, ungkup ukui di Siburan, Beratok, Tapah sereta kandang besemak.

“Pengawa tu deka mantu meri penyedar ngagai sida ke ngempu ukui enggau mensia mayuh sentang pemesai guna ngandang/ngurung ukui sida ba laman rumah diri empu,” ku iya.

Siburan udah dituku nyadi sebengkah endur kena rampit penyakit rabies pengudah ukui siga ditemu positif rabies.

Ba lansa ke bukai, penerang ari Sekretariat Komiti Mutarka Penusah Ngenyit Sarawak (SDMCS) madahka bisi 1,196 iku ukui udah dituchuk vaksin kemari, lalu penyampau semua jelu inang udah dituchuk vaksin manggai 26,228 iku, naka diatu.

Ku iya, ari penyampau nya, 18,587 iku ukui, 7,596 iku mayau lalu 45 iku jelu ke bukai.

Program Vaksin Ukui kemari, dikena ngemunaska pengelekai igi penyakit rabies ke mega diatur di mayuh bengkah genturung pendiau baka di Kg Tringgus Rabak Rotan, Kg Tringgus Bong, Kg Tringgus Matan, Kg Stampin enggau Stutong.

Naka diatu, Opis Servis Vaterina Sarawak ( JPVS) udah ngatur 159 bengkah kimpin meri penyedar rabies di genturung pendiau enggau di sekula, di kandang menua kena pangka lalu udah digulu 31,363 iku.

Kenu ku sekretariat, bisi 27 kes ketup baru ti diripot kemari (4 Ogos), ke alai 13 di Serian, dua di Sri Aman lalu 12 di Kuching, ngujungka penyampau kumulatif ketup ukui ngagai 1,442 iti kes kenyau ari 1 April.