Raban indai tunggal diperansang nyikap diri enggau pengelandik ICT, ku Fatimah
KUCHING: Raban indai tunggal lebih agi di nengeri tu ke bejalaika pengawa dagang dipinta sereta dilalau nyikap diri ngena pengelandik teknologi pemadah enggau penyambung (ICT).
Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau pemansang Nembiak mit, Datuk Fatimah Abdullah madahka, laban bisi pengelandik ba ICT ulih mantu raban indai tunggal ngerembaika market produk jauh agi.
“Ambika chunto, orang dagang ari genturung pendiau tauka menua pesisir, enti kitai nadai ngembuan pengelandik asas dalam bidang ICT, tentu produk sida iya nya ukai semina ulih dijual ba menua tu aja.
“Tang ( ngena penemu ICT), kita ulih ngerembaika kaul dagang ngena chara ngelakuka produk nengah dagang char online sereta ulih masuk ngagai pasar besai nyentuk ngagai renggat antarabansa.
“Tu mega ulih mantu orang dagang nambahka penatai pemisi ti lebih mayuh,” ku iya.
Iya mansutka pekara nya lebuh bejaku ba Majlis Penutupan dan Penyampaian Sijil Kursus Kemahiran Asas ICT ungkup Raban Indai Tunggal ke diatur ba Wisma Wanita, Jalan Sultan Tengah, ditu, kemari.
Nambahka nya, Fatimah nerangka pengelandik nya deka ulih nyaga raban indai tunggal ngambika enda mudah dikemulaka orang nengah jaringan jalur lebar.
Kelimpah ari nya iya madahka senipak enggau polisi ekonomi digital, opis menteri udah ngelangkar program ti enggau juluk deka ngelaku sereta nyual produk orang dagang di nengeri tu ngena digital.
“Program tu diberi nama Program Digital Kenyalang ke alai semua orang dagang deka diajar chara nyual produk ngena chara digital tauka ngena online.
“Taun tu juluk opis menteri deka ngemeratka lima kandang menua nyengkaum Kuching, Samarahan, Sri Aman, Sibu enggau Limbang lalu dipelabaka penyukak penatai pemisi ulih diasaika pengudah nyual produk chara digital iya nya RM4.5 juta nyengkaum bisi 3,000 iku penyereta ke dipilih,” ku iya.
Kursus Kemahiran Asas ICT untuk Raban Indai Tunggal nya udah dipasuk 30 iku pesereta ti udah diatur berengkah 31 Julai ngagai kemari (4 Ogos).
Kursus nya diatur Opis Orang Indu enggau Ruang Bilik Sarawak (JWKS) enggau kerejasama Gerempung Indai Tunggal Sarawak (PITSA) sereta Kelab Carnation Bahagian Kuching/ Samarahan.
Sama bisi datai, Direkctor JWKS Noriah Ahmad.