CDF Swinburne pengerandang nyapai juluk perintah
Penumbuh palan tu mega meri penguntung ngagai peranak menua pesisir maju dalam ekonomi digital
KUCHING: Penumbuh Centre For Digitals Futures (CDF) Universiti Technology Swinburne senipak bendar enggau juluk perintah nengeri nuju ekonomi digital.
Menteri Muda Pelajar enggau Pansik Teknologi, Dr Annuar Rapa’ee madahka, laban teknologi digital ulih meri pengelebih nyengkaum ngerapitka takah entara kandang mengeri enggau menua pesisir.
Iya madahka teknologi digital ukai semina meri penguntung ngagai bala akademik tang mega meri penguntung ngagai peranak menua pesisir maju dalam ekonomi digital.
“Enggau penumbuh Centre For Digitals Futures Swinburne tu, aku ngarapka kita (Universiti Teknologi Swinburne) ulih bejalaika tanggungpengawa ngerandang juluk kitai menua Sarawak ti ngemeratka digital teknologi lebih agi dalam ekonomi raban bansa.
“Aku arapka enggau penumbuh palan tu, kitai deka ulih ngadu mayuh agi pansik industri ke bejalaika tanggungpengawa ba palan tu begulai enggau Universiti Teknologi Swinburne (pemansik) seraya dikena ngenegap kaul industri.
“Laban penegap kaul entara industri enggau raban pemansik deka ngasilka penguntung, ti ukai semina nguntungka raban pemansik sereta in- dustri aja tang mega meri penguntung ngagai menua,” ku iya.
Dr. Annuar ke mega Menteri Muda Pengawa Berumah enggau Pengerai Mensia Mayuh mansutka pekara nya nya lebuh bejadika Centre For Digital Futures enggau ngemataka pengawa nyain Sempekat Semaya enggau Sempekat Pemereti ati (MoU) ke diatur ba Universiti Teknologi Swinburne ditu, kemari.
Lebuh ke ngenang pasal pengawa pemansik Dr. Annuar madahka perintah nengeri tu deka ngenukuka menua tu enda tinggal ari industri 4.0 ti begunaka mayuh pengawa pemansik enggau pemansang (R&D).
Tambah mega iya madah- ka dikena nentuka industri 4.0 meri empas ke pemadu manah, nengeri begunaka asil inovasi enggau kreatif.
“Lali kitai Sarawak patut enda tinggal dibelakang lebih agi dalam industri 4.0, laban kitai meda kepala menteri enggau bala pegawai iya udah bejalaika mayuh atur nyengkaum worksyop enggau ke bukai lalu ngasilka Blueprint ke ulih diguna dalam digital jemah ila di Sarawak.
“Kitai meri puji enggau pengaga ati ngagai Swinburne laban ti mujur numbuhka palan tu, tambah mega penumbuh tu senipak bendar sereta aku ngasaika tu amat beguna ngagai kitia besaup enggau perintah bejalaika polisi tu,” ku iya.
Ba atur pengawa nya kemari Dr. Annuar ngemata pengawa nyain MoU bejalaika pengawa pemansik entara Sarawak Forestry Corporation ti diarika Chief Executive Officer Wong Ting Chung enggau Deputy General Manager iya Julaihi Abdullah diarika enggau Swinburne Sarawak ti diarika Director Research and Consultancy Wallace Wong enggau Associate Dean, Faculty of Business & Design, George Ngui.
Nambahka nya Swinburne Sarawak diarika Wallace Wong enggau Ngui bisi nyain MoU iya nya besemaya meri latih begulai enggau Click Academy Asia ti diarika Ketuai Pemesai Eksekutif, James Ho enggau Patrick Then ke nyadi Direktor Centre for Digital Future.
Nitihku Wallace dalam jaku pengelalu iya lebuh ke ngenang pasal Centre For Digitals Futures, iya madahka nya ukai semina ruang aja tang mega nyadi palan endur bala raban pemansik, inovator, industri enggau raban bansa.
“Enggau penumbuh sereta pengawa bejadika palan tu, kami nguna peluang ke disediaka nitihka juluk nengeri dalam ekonomi digital.
“Lalu kerejasama kami bejalaika pengawa pemansik enggau Sarawak Forestry Corporation, kami deka besaup ngemansang kereban ke ulih ngelala bansa kayu ngena teknologi digital.
“Nambahka nya sempekat ke diasain enggau Click Academi Asia, kami deka bekerejasama translate industri enggau akademik ngagai kursus latih pemansang profesional pandak,” ku iya.
Aku arapka enggau penumbuh palan tu, kitai deka ulih ngadu mayuh agi pansik industri ke bejalaika tanggungpengawa ba palan tu begulai enggau Universiti Teknologi Swinburne (pemansik) seraya dikena ngenegap kaul industri. Dr Annuar Rapa’ee Menteri Muda Pelajar enggau Pansik Teknologi