MoU kerejasama PPKS enggau JKM Sarawak udah mujur disain
KUCHING: Pusat Pembangunan Kemahiran Sarawak ( PPKS) nyain sempekat pemereti ati (MoU) begulai enggau Opis Pengintu Pengelantang Raban Bansa (JKM) Sarawak, apin lama.
MoU nya asil ari Aum Besai Tiap Taun ( AGM) PPKS kena 2 Ogos tu tadi ti ngemeratka kerejasama entara piak perintah, industri enggau akademik ba pengawa ngemansangka penyampau pengereja pengawa.
Nengah MoU nya, PPKS enggau JKM Sarawak ulih nyendiaka program pemansang ungkup raban nembiak lebih agi ba atur pengawa ngangkatka pengelandik enggau pengawa ke dipejalaika raban nya.
Nyerumba AGM nya ke dipejalaika ba Kolej Teknologi Lanjutan Sarawak (I-CATS) ditu, bisi diatur pengawa milih Kaban Kom- iti Pengatur Pengawa PPKS renggat 2017- 2020, sereta Tan Sri Datuk Amar Abdul Azizi Husain agi mengkang dipilih nyadi chairman.
Nambahka nya, dua kaban baru Press Metal (Bintulu) Sdn Bhd enggau Yunco Enterprise Sdn Bhd nerima Setipikit nyadi kaban ari Chairman PPKS Tan Sri Datuk Amar Abdul Azizi Husain.
Aziz ti bejaku ba pengerami nya meri terima kasih ngagai semua pemegai amanah nyengkaum piak perintah enggau industri ke udah mayuh meri sukung ngagai PPKS.
Kelimpah ari nya dibaruh progarm pemungkal, bisi 64 iku nembiak ke datai ari ruang bilik ke kurang penatai pemisi nerima latih nengah program latih pengelandik pengelama tiga bulan baka Kulinari, Ngaga Pastri, automotif enggau Sistem Komputer ba PPKS.
Pengerami nyain MoU nya dikemujurka Aziz enggau Direktor Eksekutif PPKS Hallman Sabri ti ngarika PPKS lalu JKM Sarawak diarika direktor iya Abang Shamsudin Abang Seruji sereta Ketuai Unit Pemansang Ekonomi JKM Sarawak, Zainal Taram.
Bisi 13 organisasyen dipilih ba renggat baru, iya nya PETRONAS, Sarawak Timber Industry Development Corporation, Sarawak Energy Berhad, Press Metal Bintulu Sdn Bhd, Malaysia LNG, KTS Timber Industries Berhad, KKB Engineering Berhad, SAINS, Brooke Dockyard & Engineering Works Corporation, Samling Strategic Corporation Berhad, Hizone Sbd Bhd, Dewan Bandaraya Kuching Utara ( DBKU) enggau Sarawak Electronic Company Association (SECA). BINTULU: Mengeri Bintulu deka kiruh ba minggu ketiga September enggau minggu keterubah Oktober laban mayuh aktiviti ninting taun diatur perintah nengeri begulai enggau Komiti Pemansang Bintulu (BDA), Serakup Besai China Berijesta (FORCA) Bintulu nengah kerejasama Naim Land Sdn Bhd ke nyadi penyedia taba endur ngatur Karnival Tanglung Bintulu.
Menija Besai BDA, Rodziah Morshidi madah, program tu diatur kenyau lapan taun ke udah lalu nyadi program ninting taun ungkup Bintulu.
Ku iya, pengerami tu diintu lebih agi bekaul enggau main asal baka karnival tanglung, kuih Bulan, pelanda bebala mayuh enggau ngena ensikal malam hari nyengkuam Festival Gudi Entarabansa Borneo Bintulu (BIKF) enggau mayuh ke bukai.
“Laban ke nyadi piak kaunsil pelilih menua ba Bintulu, kami meransang sukung ari gerempung ukai dikuasa perintah ( NGO) dalam ngatur aktiviti ke baka tu dikena ngerichah agi mengeri Bintulu,” ku bejaku ba aum media rambau nguluka pengawa baum begulai enggau pengari FORCA Bintulu sereta Naim Group of Companies ba Bilik Aum Wisma Bintulu kemari.
Bela datai Mandal Menija Besai (Servis Rampa Sekitar) BDA, Wan Ibrahim Wan Ali; Menija Senior (unit Servis Kandang Mengeri), Abdul Wahab Hashim Bujang; Menija Penyambung Mensia Mayuh BDA, Muammar Quaddafi Abdul Razak; Presiden FORCA Bintulu, Hii Toh Him enggau Angelyn Kho ti ngarika Naim Land Sdn Bhd.
“Kitai deka mengeri Bintulu enda sunyi lalu nentuka iya nyadi palan endur mensia mayuh betemu nengah program ke bisi diatur,” ku iya.
Iya madah, aktiviti nya deka diatur siang enggau malam nyadi aktiviti ninting taun dikena nentuka Bintulu nyadi palan pemadu manah dilawa ba Sarawak.
Ku iya, ungkup program BIKF kena ujung September, bisi 24 buah menua udah ngenuku diri ngambi bagi ngulu festival tu.
“Kami arapka peranak Bintulu enggau serata menua Sarawak bela nyukung aktiviti ninting taun BIKF laban tu entara program besai ke diatur ba nengeri tu lalu nerima sukung ukai semina rayat Sarawak enggau menua tu aja tang mega ari mayuh kelab ba menua luar baka China ke chukup rindu nyereta tu,” ku iya.
Kelimpah nya ku iya, BDA mega deka ngatur Sesi ` Town Hall’ ungkup kali kedua kena 17 Ogos tu ba Auditorium BDA lalu deka bejuraika topik `Menjadikan Bintulu sebagai bandar yang hidup’.
“Jurai tu betuju dikena jalai ke pemadu manah nempa menua Bintulu nyadi mengeri ke ‘idup’, ngerindu ati, meri pengelantang sereta manah dilawa semua orang.
“Kami mega bisi ngangau- ka pengelicha, ari unit kaul mengeri ti deka nerangka pasal projek barang dikena baru, kimpin badu ngena plastik Styrofoam enggau pemar dikena nentuka mengeri tu mengkangka beresi,” ku iya.
Berebak enggau nya pasal Karnival Tanglung Bintulu, tu deka bepun 31 Ogos nyentuk 3 September ba Naim Street Mall Bintulu Paragon iya nya Pekit Seni Mural Bintulu.
Ditangkan enggau Pesta Pemakai Bintulu, Pengawa Mandangkan Main Asal Pupu Bansa, Pekit Belagu Sarawak, Sabah enggau Brunei sereta 29 September nyentuk 1 Oktober, Aktiviti Nungkun Lampu Tanglung (27 September), Tanda Singa Tradisional Sarawak enggau Borneo (28 September), Pekit Betanda (29 September), pengawa kuih Kuih pemadu panjai Mayalasia ngambika dipasuk ba Malaysia Book of Records (MBOR) enggau Maju Sarawak Run (30 September).