Ajar rebak baru pasal sejarah ti betul, ku Sikie
Pemereti pasal sejarah penumbuh Malaysia ulih nyeliah sida teparuk enggau ulah penyelawai
SIBU: Rebak baru ti ada pengudah merdeka patut diajar enggau sejarah ke betul kelebih agi baka ni menua Malaysia ditumbuh ngambika sida enda nyadi ‘penyelawai’ dalam menua tu.
Menteri Muda ba Opis Kepala Menteri ( Undang Undang enggau Adat Bumiputera), Datuk John Sikie Tayai madah sekeda rebak baru kemaya hari enda meretika tipan jerita ke bendar menua tu, deka agi nyadi penyakal tauka ‘penyelawai’.
“Engka kurang mereti tauka enda dipadah enggau nyemetak maya di sekula, mayuh agi rebak baru nyadi ‘penyelawai’ tauka nyakal perintah.
“Tu ngujungka semua pekara ti digaga bala menteri, pengari rayat, bala ketuai raban bansa enggau ke bukai, salah ba mata sida,” ku iya lebuhka bejaku ba Program Membara Semarak Kemerdekaan enggau Makai Serumpu di Rumah Sekaya, Sungai Penyarai, Kakus apin lama ke udah.
Program diatur Opis Pekara Khas (JASA) Sarawak digulu urung 450 iku peranak ke diau besemak. Sama bisi datai pengari Pemesai Pelilih Tatau, Long Jok, Pemesai Pemadah Pelilih Tatau, Rinta Engkamat, Penghulu Sanok Magai sereta bala bukai.
Sikie ke mega Kaban Kunsil Nengeri (ADUN) Kakus madah, nengah program diatur JASA nya dikearap ulih meri penerang nyemetak agi ngagai rebak baru bekal enggau gaya pengidup rebak ke dulu suba, sebedau enggau pengudah menua tu nyapai merdeka.
Rebak kemaya hari ku iya, patut diterang enggau pekara sejarah ke bendar kelebih agi bekaul enggau pengawa sida ke dulu ti berambunka nyawa ngulihka merdeka ungkup Sarawak.
“Tu nyengkaum pekara bekaul keruga ari menua besemak ti deka minta Sarawak enggau Sabah lebuh kededua nengeri tu dibai numbuhka Malaysia,” ku iya nerang.
Berebak enggau nya, Sikie mega meri terima kasih ngagai peranak ke udah meri sukung ngagai Barisan Nasional (BN) rambau Pengawa Bepilih Nengeri (PRN) nyin tadi.
Sukung tegap ngagai BN nya ku iya, ngayanka peranak di Data Bian, Sungai Penyarai, Kakus dekaka pemansang seruran bisi di menua sida.
“Terima kasih ngagai semua ke udah meri sukung tegap,” ku Sikie seraya nambah BN bulih lebih 90 peratus undi di sitak nya.
Berebak enggau program nya, iya mega bisi ngemendarka geran RM30,000 ngagai Komiti Pemansang enggau Pengelikun Genturung Pendiau (JKKK) Rumah Sekaya lalu RM7,000 da agi ngagai Biro Indu Rumah Sekaya.
Engka kurang mereti tauka enda dipadah enggau nyemetak maya di sekula, mayuh agi rebak baru nyadi ‘penyelawai’ tauka nyakal perintah. Datuk John Sikie Tayai Menteri Muda ba Opis Kepala Menteri (Undang Undang enggau Adat Bumiputera)