Karnival, roadshow platform pemadu manah ngelaku produk
Bala pedagang ulih betukar penemu pasal chara nambahka asil ti mayuh
BINTULU: Program baka karnival enggau roadshow entara platform ti pemadu manah dikena mantu orang dagang menua tu meri kelala sereta ngelakuka produk seraya ulih nyungkakka asil ari pengawa nyual produk nya.
Kaban Kunsil Nengeri (ADUN) Samalaju, Majang Renggi madahka, program ti baka nya ukai semina ulih ngelaku sereta nyual produk tang ulih betukar penemu enggau pangan diri pasal bakani ulih nambahka asil ti lebih mayuh sereta bisi kualiti.
“Chara tu bisi ngayanka pemujur laban tiap iku ke ngambi bagi ba program nya deka meri kelala pasal produk sida seraya ke ulih ngenegapka orang dagang menua tu,” ku iya.
Iya mansutka pekara nya lebuh bejaku ba pengawa bejadika Showcase Merdeka Persatuan Anak Vaie Bintulu (PAVB) 2017 ke diatur ba Paragon Street Mall ditu, kemari.
Majang madahka program ke diatur gerempung nya senipak bendar sereta ngarapka program nya ulih mantu ngerembaika asil dagang orang dagang menua tu enggau servis ungkup orang mayuh ti disediaka ejensi enggau opis perintah.
Kelimpah ari nya iya madahka program nya ulih nempa sereta ngenegapka kaul raban bansa di bagi menua Bintulu.
“Nambahka nya, program ti baka tu mega ulih ngenegapka agi penyerakup raban bansa enda ngira bansa enggau jalai pengarap ba bagi menua Bintulu seraya nempa runding talukka menua ngagai raban bansa,” ku iya ti mega bisi bejalai ngagai bansal pemandang ke dibuka ba program nya.
Sama bisi datai ADUN Murum Kennedy Chukpai Ugun, Temenggung Datuk Barry Yek Siew Hui, Pemanca Dato Dr Francis Toh enggau Penghulu Drahman Kawi.
Chara tu bisi ngayanka pemujur laban tiap iku ke ngambi bagi ba program nya deka meri kelala pasal produk sida seraya ke ulih ngenegapka orang dagang menua tu. Majang Renggi ADUN Samalaju