Cuepacs Sarawak nyukung penemu minta skim servis gred 19 dikemanah

KUCHING: Kongres Kesatuan Pekerja- pekerja Dalam Perkhidmatan Awam (Cuepacs) Sarawak nyukung sereta sepenemu enggau Cuepacs Pusat, minta perintah ngemanahka agi skim servis gred 19.

Sekretari Cuepacs Sarawak, Omar Bahrien Unin bepenemu taja pan skim servis gred 19 nya ditikika ari gred 17 taun nyin kemari tang bisi pematut ditikika baru berindik ari tanggungpengawa pengereja pengawa ba gred nya ti majak nambah.

Bepelasarka skim ke diatu, pengereja pengawa gred 19 nerima gaji nyengkaum elawin entara RM1,700 ngagai RM1,900 ke dipeda bedau tentu ulih mantu (gred nya) lebih agi ke gawa ba mengeri besai, kelimpah ari ungkus pengidup ti majak tinggi.

“Cuepacs Sarawak nyukung penemu Cuepacs Pusat ti minta perintah ngemanahka skim perkhidmatan gred 19 ti mungkur lebih 100,000 pembantu tadbir dalam sektor perintah nyengkaum badan berkanun enggau Pihak Berkuasa Tempatan (PBT).

“Pengawa niki sereta ngemanahka gred nya endang patut dipejalaika laban kitai ngerunding tating pengawa sida tiap taun ke majak nambah.

“Tanggungpengawa bala pembantu tadbir enda ngira bagi sektor, endang chukup beguna,” ku iya madah ngagai Utusan Borneo nengah aplikasi WhatsApp, kemari.

Isu minta ngemanahka agi gred 19 kala dikenataika sebedau tu, sereta ngarapka ulih dipejalaika taun tu sereta enggau perambu minta numbuhka gred 28 ke udah lebih setaun dilanggur.

“Pengawa meda baru skim nya ulih dipejalaika laban gred 20 enggau 26 ulih diperundingka. Enti sida bisi diploma, beri meh nitihka tikas diploma lalu nyema nadai, ulih dikira bepelasarka peneleba gawa,” ku iya.