Sitak Selangau meruan nyadi ‘deposit tetap’ BN
Entulu enggai kiruhka petalat tang terus numpuka tanggungpengawa ngatur pemansang ba Selangau
KUCHING: Kaban Parlimen (MP) Selangau, Datuk Joseph Entulu Belaun enggai kiruhka petalat dalam Parti Rakyat Sarawak (PRS) tang terus numpuka tanggungpengawa ngatur pemansang fizikal ba sitak dipegai iya.
“Naka diatu, penuduk Selangau meruan likun. Seagi Barisan Nasional (BN) enda bejalaika strategi ti tau medis rayat, Selangau endang deka nyadi deposit tetap BN,” ku Entulu madah ngagai The Borneo Post ditu, kemari.
Iya enggai nerang silik tang semina nyebut iya deka ngemeratka agi pemansang di pelilih nya, ke alai lebih 800 buah rumah panjai begunaka perati iya.
“Kami bisi perambu besai ungkup Pelilih Selangau kelebih agi dalam sukut pen- yikap perengka guna pemun baka bekal ai enggau elekterik ngagai urung 20 buah rumah panjai ti patut diperati enggau jampat,” ku iya.
Ku Entulu, piak sida udah nyediaka portable meresi ai ‘Life Saver’ ungkup rumah panjai ti agi begunaka bekal ai beresi.
“Kami mekalka perengka meresi ai mit ngena teknologi UK laban iya endang beguna endar ngagai komuniti ti mit agi,” ku iya.
Iya mega madahka diri deka minta kerejasama Menteri Bekal Ai enggau Elekterik Menua Pesisir, Dato Sri Dr Stephen Rundi Utom senentang baka ni teknologi meresi ai irup pemadu baru baka PAULA (Portable ti ulih dikena di kandang menua ulu di Selangau).
“Aku deka berandau enggau Dato Sri Dr Rundi baka ni teknologi meresi ai irup mit ke bar utu ulih dikena di sitak aku,” ku iya nyemetak
Apin lama ke udah, Dr Rundi madahak PAULA ulih diuji ba dua bengkah menua ulu di Sarawak sekalika iya ulih dikena ngemanahka gaya pengidup peranak dia. PAULA tu teknologi ari German ke udah mujur dikena di kandang menua di Vietnam. Dr Rundi udah madahka baka ni PAULA mujur dikena di kandang menua ulu di Vietnam.
Ngelansa pasal bekal elekterik, ku Entulu, tebal agi rumah panjai ngena injin api sida empu, tang sida ti besemak enggau grid besai udah ngasaika bekal elekterik 24 jam.
“Senentang jalai alun, tebal agi rumah panjai udah disambung jalai, kelebih agi jalai batang. Taja pia, agi tubah semina ulih dilawa ngena perau,” ku iya.
Entulu nyetemak madahka iya udah bebendar gawa nyaup dua iku Kaban Kunsil Nengeri (ADUN) ari baruh sitak Selangau, ADUN Kakus Datuk John Sikie Tayai enggau ADUN Tamin Christopher Gira, seduai tu bela ari PRS.
Naka diatu, penuduk Selangau meruan likun. Seagi Barisan Nasional (BN) enda bejalaika strategi ti tau medis rayat, Selangau endang deka nyadi ‘deposit tetap’ BN. Datuk Joseph Entulu Belaun Kaban Parlimen Selangau