Perintah Sarawak udah ngelala 58 palan nimbun ai ti deka digazet
SIBU: Perintah Sarawak udah ngelala 58 bengkah palan nimbun ai ti diperambu deka digazet dalam timpuh dua taun, pia ku Menteri Bekal Ai enggau Elekterik Menua Pesisir Dato Sri Dr Stephen Rundi.
“Belalauka pelin timpuh pandak (datai ba taun 2020), 58 bengkah endur deka digazet dataika pengujung taun 2018.
“Dataika diatu, bisi 29 bengkah palan nimbun ai udah digazet di nengeri tu enggau penyampau bungkur menua 4,079,535 hektar pemesai.
“Kena nambah, pengawa ngazet palan nimbun ai deka disusun enggau Ordinan Air 1994 enggau Ripot Ketuai Audit Menua (AG) 2016,” ku iya madah ngagai The Borneo Post kena Hari Dua tu tadi.
Dr Rundi nimbal berita The Borneo Post ke diberi topik ‘Gazette all water catchment areas as soon as possible’ dikeluar kena Hari Dua tu tadi, ke alai seiti ari perambu ungkup Sarawak dalam Ripot Ketuai Audit Menua 2016 ngagai piak bekuasa ai di nengeri tu ngambi ngazet kesemua palan nimbun ai enggau naka penyampat dikena nagang aktiviti salah ari ngeruga tikas pemeresi ai.
Ku iya, dalam pelin timpuh jelan iya pengelama (20212025) enggau pelin timpuh panjai ( ngelui ari 2025), perintah nengeri deka ngemeratka perambu palan nimbun ai baru ngambi digazet.
Ripot mega bisi nyebut kapasiti Palan Meresi Ai Batu Kitang enda ulih nangkup peminta bekal ai beresi ungkup Kuching enggau sebagi ari Bagi Menua Samarahan Division datai ba taun 2020.
Dr Rundi madahka pekara nya bula laban Lembaga Air Kuching (KWB) udah nambahka kapasiti enggau ngemesaika plant 3 ari 200 juta liter ninting hari (MLD) ngagai 400 MLD - nambah 200 MLD.
Nitih ku Kaban Kunsil Nengeri (ADUN) Kemena, sebagi ari pengawa ngemesaika nya diatu udah tembu.
“Nya alai, datai ba taun 2020, kapasiti palan ai deka manggai 763 MLD enggau purata peminta ai 653 MLD, lalu tu deka bisi lebih 110 MLD,” ku iya nampung.
Ku iya, taja bisi kapasiti chukup datai ba taun 2020, KWB udah bejalaika pengawa nyiri konsultan ngambika mansik baru pelin besai bekal ai enggau ngemesaika pemansut ai sida seriris enggau penambah ba peminta ari Mengeri Kuching sereta di Kuching dudi hari.