Kurang pengelandik bejaku English entara kebuah sekeda graduet mengkang nadai kereja, ku Dennis
LIO MATO (Baram): Puntan tauka enda ulih mai diri empu kelebih agi maya ngulu intebiu diatur dalam Jaku English nyadi sekeda kebuah graduet mengkang nadai kereja.
Kaban Kunsil Nengeri (ADUN) Telang Usan, Dennis Ngau rambau ngelancharka sukut Highly Immersive Program ( HIP) di Sekula Primari (SK) Lio Mato, Baram, kena Hari Lima tu tadi, bisi ngingatka bala nembiak sekula primari di ulu Baram ba pekara pemesai guna sida ulih bejaku, macha enggau nulis dalam Jaku English.
“Taja bala kita belajar enggau diau di menua ulu sereta ngena jaku asal Kenyah enggau Jaku Melayu nyadi batang jaku, tang anang sesekali berunding tauka ngumbai Jaku English tu enda beguna laban iya jaku menua luar,” ku Dennis.
Nunjukka Jaku English tu jaku antarabansa, ku Dennis, iya batang jaku di tetiap opis nyengkaum pengawa bukai di serata dunya.
“Nadai ngira dini menua ti digusung tauka bisi pejalai gawa antara perintah menua nyengkaum pengawa nampung pelajar di menua bukai baka China, Jepun enggau Korea sereta ke bukai, jaku tu beguna endar ngambika kita ulih mereti sereta berandau, macha enggau nulis dalam Jaku English.
“Bala kita enda ulih lari ari ngena Jaku English lalu tu deka nambahka nilai kita nyema mereti sereta ulih bejaku dalam jaku nya ba menua ti ngena batang jaku baka Mandarin enggau Kantonis di China enggau Hong Kong,” ku Dennis.
Kelimpah ari nya, tebal agi pemerindang baka siri televisyen ti dipeda enggau lagu didinga sida datai ari menua ti bejaku ngena Jaku English.
ADUN muji inisiatif dipejalaika kepala pengaja enggau pengajar di SK Lio Mato ti ngadaka HIP tauka sukut dikena meransang bala nembiak berandau ngena Jaku English enggau bala bakih, sida sebilik enggau bala pengajar dikena nambah sereta najamka pengelandik sereta meretika agi jaku nya.
Berasai gagit enggau pemanah timbal ari bala nembiak nyengkaum apai indai enggau pengajar ba program nya, Dennis ngelalau ngambika sida bejaku ngena Jaku English tetiap hari, maya berandau enggau bala bakih, diri sebilik laban suah agi dikereja deka manah agi asil iya.
“Anang semina berandau ngena Jaku English maya kepala pengajar enggau pengajar bisi aja,” ku iya nandu.
Sama bisi datai Sapit Pemesai pelajar Marudi Jalong Wan enggau Kepala Pengajar Sintan Lugat.