Ketuai komuniti ningkah penerang dipansutka Andy
Sida enda setuju penerang dipansutka Andy ngumbai ADUN Engkilili nadai hak ngeringka Nyalau
KUCHING: Bala ketuai renggat komuniti ke mega pengundi ba Lubok Antu nyukung penuh penemu dipansutka Kaban Kunsil Nengeri (ADUN) Engkilili Dr Johnical Rayong Ngipa ti bejakuka hak rayat ke dijaga iya nyengkaum ngeringka bakih sama dalam Barisan Nasional iya nya Kaban Parlimen Lubok Antu Datuk William Nyalau Badak.
Sida ningkah penemu ke dipansutka Ketuai Pemadah Nembiak Parti Rayat Sarawak (PRS) Andy Lawrence nengah sebengkah surat kabar, apin lama ke udah ti madahka Dr Rayong nadai hak bejaku pasal Nyalau ke mega komiti tinggi PRS.
Penghulu Gerang Ancheh madahka Dr Rayong endang bisi hak bejaku tauka meri buah penemu bekaul sitak iya ukai semina ketegal iya ti nyadi pengari rayat tang mega iya seiku pengundi di sitak Engkilili enti dibanding enggau Andy peranak asal Kapit.
Nangkan nya ketuai komuniti ba menua nya ke bela mansutka penerang sebaka iya nya Tuai Rumah Johnson Damu enggau TR Pindi Gerang.
Gerang madahka Andy nadai hak deka bejaku ngarika Barisan Nasional (BN) laban iya kala chakah nge- laban BN lebuh ti ngaul diri enggau Sarawak Workers Party (SWP) begulai enggau presiden parti nya suba Larry Sng ngelaban Nyalau rambau Pengawa Bepilih Besai (PRU) Ke-13.
Ba PRU13 nya, Nyalau mujur teulihka 8,278 undi ngalahka Larry Sng (4,187 undi) lalu chalun Parti Keadilan Rayat (PKR) Nicholas Bawin Anggat (2,530 undi)
“Lebuh Andy begulai eng- gau Larry Sng ngelaban BN taun 2013, YB kitai (chalun ti dipilih) Rayong udah dichiri Nyalau nyadi ketuai kimpin lalu iya (Rayong) sigi bebendar nyaup nentuka pemujur BN ba Lubok Antu,” ku iya.
Udah nya, Tr Johnson ke mega Ketuai Pemadah Nembiak United’s People Party (UPP), madahka Dr Rayong endang naka ulih nyukung parti rambau PRU13.
Maya iya bekimpin ke Larry Sng, Andy nadai kala nyebut pekara ti manah bekaul PRS, tang udah nya iya mansutka diri ari SWP lalu nyereta PRS, ku Johnson nyemetak.
Tr Pindi ke mega Sapit Nembiak UPP madah, Dr Rayong endang ketuai asal dalam BN lalu pia mega Nyalau ti seruran siruka pengelantang pendiau ra- yat.
Nambahka nya, Dr Rayong bisi hak bejaku pasal Engkilili pengudah iya menang rambau Pengawa Bepilih Nengeri (PRN) 2016.
Tr Pindi madah, Lubok Antu ngembuan urung 20,000 iku pengundi, lalu enti dipechahka bisi 9,450 iku pengundi di Batang Ai sereta urung 10,700 iku pengundi di Engkilili.
Penyampau kaban UPP ti berejister dalam kededua sitak nya mega entara kebuah BN menang di Lubok Antu, ku iya.
UPP Pampang Batang Ai aja bisi 700 iku lalu UPP Engkilili bisi 4,850 iku kaban, ku Pindi madah.
Andy semina bejaku ngapa madahka PRS deka nganti penuduk Nyalau lalu ngirai chalun baru bediri di sitak Lubok Antu ungkup PRU14.
Lebuh Andy begulai enggau Larry Sng ngelaban BN taun 2013, YB kitai (chalun ti dipilih) Rayong udah dichiri Nyalau nyadi ketuai kimpin lalu iya (Rayong) sigi bebendar nyaup nentuka pemujur BN ba Lubok Antu. Penghulu Gerang Ancheh