Sayap Indu PKR Selangor deka ngatur forum ungkup indu ditu kena 17 Ogos
KUCHING: Sayap Indu Parti Keadilan Rakyat (PKR) Selangor bisi numbuhka ‘Think Tank’ Palan Orang Indu Tebilang Selangor (IWBS) lalu meransang raban indu ari serata nengeri tu, baik nya Gerempung Ukai diKuasa Perintah (NGO) tauka parti politik ngulu sebengkah forum ke diatur sida dikena ngangkatka mayuh agi pengari orang indu dalam Kunsil Nengeri.
Ketuai Indu PKR, Zuraidah Kamaruddin mai gerempung aktivis orang indu sereta parti politik ( enda ngira parti politik piak perintah tauka penyakal) sama ngulu forum tu.
“Aku deka meda mayuh agi penyereta orang indu ngarika kitai ba Kunsil Nengeri laban kami bisi ngungkupka penuduk ngagai sida.
“Reti nya, genap perintah nengeri patut beratika pekara tu enggau berat laban Perintah Besai puntan meri awak ke mayuh ngagai orang indu ba megai penuduk menteri, tauka ba renggat nyadi Kaban Parlimen (MP),” ku Zuraidah.
Iya madah munyi nya ba aum media, sebedau bekejang ngagai Semenanjung Malaysia di Padang Bilun Entarabansa Kuching (KIA) ditu, pagi kemari.
Zuraidah ti mega nyadi Kaban Parlimen (MP) Ampang, enggau sekeda ketuai pemesai PKR ari Semenanjung Malaysia bisi datai di menua tu dalam kandang dua hari tu ke udah.
Iya mega madahka, di Selangor, pemayuh pengari orang indu ke mangku pengawa besai baik di renggat parti politik tauka wakil rayat tauka gerempung besai mujur nyapai 30 peratus.
“Nya alai, kami gagit endar ati deka ngaga seiti program di serata menua, mai semua aktivis orang indu sampal ngulu forum tu, alai kami minta sida iya ngangkatka mayuh agi penyereta orang indu ari sitak diri kelebih agi ba Pengawa Bepilih Besai (PRU) ke-14 tu ila, nyengkaum Perintah Nengeri meri awak penuduk ungkup orang indu.
“Reti nya, chalun ke dipilih parti nyadi pengari rayat deka megai tanggungpengawa ba sekeda portfolio, sereta pangku pengawa ke besai.
“Kami arapka orang Sarawak deka enggau ngulu program tu. Voon (Mandal Ketuai Indu PKR Pusat, Voon Shiak Ni) ke nyadi mandal ketuai indu PKRSarawak deka mantu majakka penyereta ari orang Sarawak sama-sama enggau ngulu program tu,” ku iya, lalu nandu program tu deka diatur ba Sarawak kena 17 Ogos 2017.
Iya mega madahka, NGO sereta parti politik, enda ngira parti politik ari Perintah Barisan Nasional (BN) tauka penyakal sama tau enggau ngulu forum tu.
“Proram tu pasal pemerat kuasa orang indu...Jangka aku, udah datai timpuh iya, dimillennia tu orang indu diberi kuasa, ke nyerumba Tsunami orang indu,” ku iya.
Ba aum media nya mega, Chairman PKR Sarawak, Baru Bian mega nandu jaku Zuraidah madahka tuai pemesai PKR ari Semenanjung Malaysia bisi enggau ngulu program PKR di Sarawak, mantu PKR menua tu ngangkatka oemerat parti nya.
“Tuai Pemesai kami ukai orang ke rasis, ekstremis tauka ‘bigots’, lalu ketegal tu, pemerat kami ngipak peneka menua tu. Sarawak enggau Sabah bendar endar niri negi, sereta betatika hak autonomi kededua buah menua tu.
“Visi sereta pemerat ulih dikeamatka enti rayat ngundi Pakatan Harapan (PH) , lalu nambah enggau nya, pemerat kami terang endar sereta konsisten, ke disengkaum dalam manifesto PKR ari PRU 2013 tu tadi.
“Nengah ‘Kuching Declaration’ kami bisi netapka sempekat sereta atur ke kedeka rayat menua tu nengah Sempekat Malaysia (MA) 1963. Tu entara pekara kedeka rayat Sarawak enggau Sabah. Anang ngenyamaka kami enggau BN, laban PH pan bedau diberi peluang megai perintah (semina Selangor enggau Pulau Pinang aja ke udah dipegai penyakal),” ku iya ti mega nyadi ADUN Ba’kelalan.
Sama bisi ngulu aum media nya kemari, Sapit Chairman PKR Sarawak, ti mega nyadi ADUN Batu Lintang, See Chee How, Ketuai Indu PKR Sarawak, Nurhanim Hanna Mokhsen enggau MP Miri, Dr. Michael Teo.