Ukai bejaku ngapa, tang semina ngasuh MACC mansik HDC: Baru
KUCHING: Enda patut kuntriktor nuduh Chairman Parti Keadilan Rakyat (PKR) Baru Bian (gambar) enda meresa utai ke bendar dulu sebedau ngaga penerang ti madahka iya semina bejaku sengapa pasal ngasuh Opis Penagang Makai Suap (MACC) mansik pengawa ke enda betul nyadi ba Serikat Pemansang Pengawa Berumah (HDC).
“Ba surat berita The Borneo Post, bisi seiku orang (enggai madahka nama) nyaut tanya aku pasal aku ke ngasuh mansik eangka bisi pengawa salah ba HDC,” ku Baru.
Taja pia, Baru madah Menteri Opis Kandang Menua sereta Pengawa Berumah, Datuk Dr. Sum Kui Hian madahka iya udah ngasuh Sekretari Mendam opis menteri nya, Bakri Zaini mansik pekara nya bepelasarka Ripot Ketuai Audit Menua (AG) ke madahka HDC udah mayar RM2.88 juta ngagai dua iku kuntriktor ungkup pengawa ngechat tang enda digaga.
“Pengawa ngechat nya enda digaga, nya kebuah aku ngasuh MACC mansik laban pengawa nya enda digaga enggau betul, taja sida udah dibayar, nyentuk seharitu ( kemari), kuntriktor nya nyaut utai ku aku, tang enggai madah nama diri,” ku iya.
Baru ti mega nyadi Kaban Kunsi Nengeri ( ADUN) Ba’kelalan madahka ripot AG nya terang madah ripot nya enda betul, bisi pengawa salah.
“Ripot AG terang endar, enti nitih urung RM2.01 juta udah dibayar tang pengawa enda digaga enggau manah tauka bedau tembu. Kami ukai bejaku sengapa, lalu nambah enggau nya, ripot penuh diberi AG.
“Enti deka besalahka orang bukai pan, enda patut deka nuduh tauka besalahka ripot AG, enda pia? Enti nitih, AG deka nanya orang ke gaga pengawa nya, lalu sida kuntriktor patut nimbal AG (ukai aku) laban enti enda nimbal, nya pan deka pansut ba ripot AG, ukai ripot aku.
“Aku semina ngasuh MACC mansik aja, lalu nambah enggau nya, nya ari pemisi Sarawak. Nyema kuntriktor nya besalahka aku, nya deka mandangka sida iya ngenggaika ripot AG, tauka madahka ripot AG nya salah tauka bula,” ku Baru.
Taja pia, ku iya, Dr. Sim ke nyadi menteri ke megai tanggungpengawa pasal pekara nya, patut nyerahka pekara nya ngagai MACC, laban pengawa salah nya besangkut paut enggau penyampau duit ke mayuh.
“Rayat Sarawak pan patut dijamin enti bisi orang bukai diberi tanggungpengawa bejalaika pengawa nya,” ku iya.
Ba lansa bukai, pasal pemidang Chairman Star Reform Party (STAR), Johnny Bob Aput, ke kala bediri maya Pengawa Pengawa Bepilih Mit (PRK) Tanjung Datu bulan Mei taun tu tadi, ke nadai kemari, Baru sereta semua ketuai PKR Sarawak ngenataika penyinu ati ngagai sida niang sebilik.
“Kami ngenataika penyinu ati kami ngagai niang sebilik, sereta ngagai parti STAR. Ba penemu kami, kami bekunsika penyinu ati kami kelebih agi niang ke endang ditemu bebendar ngangkatka hak Sarawak nengah MA1963,” ku Baru.
Niang Johnny, ari Kpg Paon Gahat parai dipelabaka ketegal penyakit tungkul ati, mangku pengawa nyadi Chairman STAR pengudah pemidang chairman sebedau nya niang Dr.Patau Rubis ke nadai kena 20 Mac 2016.
Rambau PRK Tanjung Datu tu tadi, niang Johnny alah ngelaban chalun BN, Datin Patinggi Datuk Amar Jamilah Anu ( bini niang Datuk Patinggi Tan Sri Adenan Satem) kelimpah dilaban chalun Parti Bansa Dayak Baru (PBDS Baru), Rapelson Richard Hamit.