Ketuai Indu PKR beterima kasih dikemendar tama ke Sarawak

KUCHING: Ketuai Indu Parti Keadilan Rakyat (PKR) ti mega nyadi Kaban Parlimen ( MP) Ampang, Zuraida Kamaruddin meri terima kasih ngagai Perintah Nengeri Sarawak laban udah ngemendarka iya tama ke nengeri tu.

Zuraida sereta bala pemesai PKR bukai ke bisi datai kitu nengah Padang Bilun Entarabansa Kuching (KIA) kena dua hari ke udah, laban bisi pengawa ke diatur ulih PKR ditu, sebedau tu kala di tagang masuk Sarawak, nyengkaum sekeda ketuai penyakal bukai.

“Aku beterima kasih ngagai Perintah Sarawak laban udah ngemendarka aku masuk ke negeri tu, lalu udah datai ditu dalam kandang dua hari tu ke udah,” ku Zuraida madah ba aum media sebedau angkat pulai ke Kuala Lumpur di KIA, pagi tadi.

Iya mega ngarapka dudi hari, Perintah Sarawak ulih bejalaika pengawa demokratik, ngemendarka ketuai PKR ari luar sitak menua tu masuk nengeri tu bejalaika pengawa demokrasi ke deka mai ubah ke berat ngagai Sarawak.

“Aku ngarapka Perintah Sarawak deka bejalaika pengawa demokratik menua tu ngemendarka kami tama ke Sarawak peneka ati kami lalu ukai di tagang sereta diberi atur ke terit.

“Laban pemerat kami deka mai ubah ngagai Sarawak, nya tuju kami,” ku iya.

Sebedau tu Zuraida udah suah ditagang Opis Imigresen Sarawak (JIM) di KIA lalu diasuh pulai baru ke Semenanjung Malaysia.

Sama bisi enggau ngulu aum media nya pagi tadi, Chairman PKR Sarawak Baru Bian, Sapit Chairman PKR Sarawak See Chee How, Ketuai Indu PKR Sarawak, Nurhanim Hanna Mokhsen,

Mandal Ketuai Indu PKR Pusat, Voon Shiak Ni enggau Kaban Parlimen Miri, Dr Michael Teo.