Pengelandik bala champion pidato Iban UB-AEDIL 2017 ngemegah

KUCHING: Pekit Pengelandik Bejaku (Pidato) Iban UB-AEDIL 2017 ke tembu diatur ensanus mujur ngempung raban pemekit ke chukup landik.

Baikka nya ba kategori sekula sekondari, palan pelajar tinggi enggau ba kategori tebuka baruh 45 taun, pemekit ba renggat final mujur matak pengerindu raban akim ari Gerempung Pemansang Pelajar jaku Iban(AEDIL).

Auditorium Tun Ahmad Zaidi Adruce(TAZA), Palan Pematih Pengajar(IPG) Kampus Batu Lintang nyadi saksi pekit pidato Jaku Iban keterubah kala diatur.

Pekit diatur Utusan Borneo ( UB) nengah kerejasama AEDIL.

Temuai dipebasa, Menteri Nembiak enggau Lumba Snowdan Lawan ke datai bejadi pekit berasai gaga sereta temegah meda pengelandik raban pemekit.

Iya ti ngarika Sapit Kepala Menteri Tan Sri Dr James Masing dekaka pekit nya diatur ninting taun.

Ungkup kategori Sekula Sekondari, gelar champion enggau penuduk lumur dua pulai ngagai pemekit ari SMK Engkilili Tracy Layau enggau Jasmine Lyne Jap.

Penuduk lumur tiga pulai ngagai Marlia Anak Kilat ari SMK Song.

Martin Dinil ari Miri bulih gelar champion ba kategori Tebuka Baruh 45 taun ke alai penuduk lumur dua enggau tiga pulai ngagai Sangin Juat enggau Suda Lunyong.

Ba pekit ke sama ungkup kategori Palan Pelajar Tinggi (IPT) gelar champion pulai ngagai Micheal Bandang Tinggai.

Penuduk lumur dua enggau tiga pulai ngagai Brolin Golayous enggau Nicholas Beliang Engkabi.

NGANTI GINITI DIRI: Raban pemekit renggat final ketetiga kategori sedia mantaika pengelandik bejaku ba mua bala mayuh.

CHAMPION: Snowdan (dua kiba) nyuaka tropi gelar champion ungkup kategori tebuka baruh 45 taun ngagai Martin. Bela dipeda Chairman Pekit Churchill Edward (kiba).

AKIM PEKIT: Raban akim ari gerempung Pemansang Pelajar Jaku Iban (AEDIL).