RM100,000 bantu ungkup Rumah Nunung nengah ‘Projek Mesra Rayat’
KABONG: Sepenyampau RM100,000 agih belanja udah diberi ngagai peranak Rumah Nunung, Menggeris nengah Projek Mesra Rakyat ( PMR).
Agih belanja tu udah disuaka Kaban Kunsil Nengeri ( ADUN) N40 Kabong, Mohd Chee Kadir ba sebengkah Program Pemesai Begulai Enggau Rayat diatur di rumah panjai nya, apin lama ke udah.
Bantu nya diberi berindik ari peranak rumah panjai udah dituntung penusah angus kena 25 Oktober 2015.
Ketegal penusah nya, peranak rumah panjai semina tinggal gari ba punggung aja.
Berebak enggau program ke sama, Mohd Chee mega bisi bejadika begunan Palan Nyeridi Nembiak Mit ( TBK) Opis Pemansang Mensia Mayuh ( Kemas) Rumah Nunong lalu meri sebuah genset ungkup TBK Kemas nya.
Dalam jaku dipansutka iya, Mohd Chee madahka perintah enggau pemesai Barisan Nasional ( BN) seruran bebendar gawa meri servis pemadu manah ngagai rayat.
Ku iya, bala pemesai BN endang ngemeratka pengawa ngemai pemansang ngagai rayat, nadai ngira dini alai sida diau.
“Rayat patut meri sukung tegap ngagai program transformasyen menua pesisir ke benung chakah dipejalaika perintah ke- maya hari.
“Udah nyadi juluk perintah meri pengelantang ngagai semua rayat lalu enda sesekali ngelakka sida dikelaung ari pengawa nya.
“Rayat patut terus meri sukung ngagai perintah nentuka pemansang seruran bisi sereta enda tinggal di belakang baka ti kala diasaika menua lebuh bedau merdeka suba,” ku iya.
Pia mega ku iya, kerejasama antara rayat enggau perintah meseti rat nentuka tetiap pemansang ti udah diperambu bejalai enggau lanchar sereta nitihka tuju iya dipejalai.
Sama bisi datai Pemesai Pelilih Kabong, Kamaludin Haji Alkap, bala ketuai komuniti sereta bala bukai.