Forum Nembiak TEGAS deka nyadi pelasar endur ngelala polisi perintah

SARIKEI: Forum Nembiak Wang Turu Ekonomi Gagasan Anak Bumiputera Sarawak ( TEGAS) deka nyadi pelasar ngenataika penerang pasal perambu, polisi tauka gagasan perintah Nengeri ke diatu ungkup raban nembiak.

Menteri Muda Perambu Mengeri, Pengatur Tanah enggau Rampa Menua Sarawak, Datu Len Talif Salleh madah, nengah forum tu, raban nembiak bisi awak berandau terus enggau panel ti dikangau khas, kelebih agi bekaul enggau peluang sereta awak raban nembiak gawaka pemansang Nengeri Sarawak.

“Raban nembiak bisi pangku pengawa dalam pemansang nengeri tu, laban nembiak ti beumur ari 16 ngagai 35 taun nyadi 43 peratus ari 2.5 juta peranak di Sarawak.

Perintah udah nyediaka bemacham pelin pemansang ba mayuh bengkah sukut ti ngaum pangku pengawa raban nembiak dalam industri dagang temuai, makit enggau ngenegapka main asal, nampung pengawa seni pupu bansa enggau ngemansangka lumba di nengeri tu.

“Nya alai, kitai dekaka raban nembiak chakah agi gawa ba pelasar ti udah disediaka perintah ngambika tuju enggau juluk TEGAS deka nempa raban nembiak bisi penegap ulih dijapai ba tikas pemadu tinggi enggau meruan,” ku Len.

Iya mansutka jaku nya rambau bejadika Forum Raban Nembiak TEGAS 2017, ti udah diatur di Balai Suarah Sarikei, kemari.

Program tu diatur TEGAS enggau kerejasama Malaysian Global Innvation And Creativity Centre (MaGIC).

Nitih ku Len, batang tuju program tu diatur dikena nyediaka nembiak Sarawak nyadi ‘ change makers of tomorrow’ nengah pengawa meri penerang pemadu baru sereta pemansang nengeri Sarawak.

Ku iya nengah program tu mega, deka nentuka raban nembiak enda tinggal ngerebut awak ke bisi seriris enggau Revolusi Industri 4.0 enggau jeman pemansang Ekonomi Digital.

Iya ke mega Chairman TEGAS meransang raban nembiak ngena forum tu enggau memanah, kelebih agi ngulihka penerang, buah runding, peneleba enggau penemu ngambika mujur dudi hari.

“Semua pekara tu beguna endar nentuka nembiak nemu pangku pengawa sida ba agenda pemansang nengeri Sarawak nyingkang nyadi sebuah nengeri mansang sereta bepenatai pemisi tinggi.

“Diatu, TEGAS udah dilempaika tanggungpengawa ngemansangka ‘Digital Village’ ti nyadi awak ungkup ngemansang orang dagang ti ngena digital nyadi pelasar.

“Juluk tu deka ulih dijapai laban TEGAS udah nerima sukung tegap ari nembiak Sarawak,” ku Len nampung.

Rambau forum tu, bisi 800 iku raban nembiak udah datai ngulu lalu ngaul penyereta nembiak ari kandang menua tengah Sarawak, baka ari Sibu, Mukah, Tanjung Manis, Pakan, Julau, Saratok, Bintangor enggau Sarikei.

Sama bisi datai Kaban Kunsil Nengeri ( ADUN) Meradong, Ding Kuong Hiing, pengari ADUN N45 Repok, Eddie Loh, Residen Bagi Menua Sarikei, Mohd JUnaidi Mohidin enggau Pemesai Operasyen TEGAS, Awangku Merali Pengiran Mohd.