Sampel dua ukui ari Engkilili dikenuku negatif rabies
KUCHING: Pemutus dua sampel ukui ke dianjung ngagai Palan Pansik Veterinar (VRI), Perak kena 2 Ogos tu tadi, ngayanka pemutus negatif ba pansik makmal.
Nitihku Sekretariat Komiti Mutarka Penusah Ngenyit Nengeri (JPBN) Sarawak, pemutus ke diterima nya, diambi ari dua iku ukui ke nadai orang ngempu di Pasar Engkilili, Sri Aman.
Naka pukul 3 lemai, Hari Enam ke udah, bisi 835 iku ukui diberi vaksin nyerumba Program Nuchuk Vaksin Ukui chara besai dikena nyeliah sereta nagang pengerekai penyakit ukui gila tauka rabies ke diatur ba Dewan Bola Keranjang Sg Apong.
Kelimpah ari nya, program vaksin nya mega diatur ba sekeda genturung pendiau tauka Kampung di pelilih Bau iya nya Kampung Suba Buan, Kampung Suba Bau, Kampung Suba Bandar, Kampung Grogok, Kampung Nowang, Kampung Opar, Kampung Rumih, Kampung Tembawang Sauh, Kampung Stenggang enggau Kampung Jugan.
Bepelasarka penerang ke dikeluarka Skretariat JPBN Sarawak, naka ke diatu jelu tupi ke udah diberi vaksin bisi 27,132 iku ti nyengkaum 19,490 iku ukui, 7,597 iku mayau enggau 45 jelu bukai.
Lalu penyampau kimpin penyedar ke udah diatur pasal igi penyakit rabies ke diatur ba genturung pendiau tauka Kampung sereta sekula iya nya agi 159 sereta udah digulu 31,363 iku pesereta.
Kelimpah ari nya, Opis Pengerai Nengeri sarawak (JKNS) ngeripotka bisi 57 kes ketup diriputka kemari ti nyengkaum 35 kes ketup diripotka ba bagi menua Serian, Kuching (19 kes) enggau Samarahan (3 kes).
Enggau penyampau nya nyadika semua kes ketup ukui ke nyadi berengkah 1 April ngagai 5 Ogos iya nya 1,499 keslalu bisi 805 iku udah dituchuk vaksin anti-rabies.
JKNS minta orang mayuh ke bisi sejarah kena ketup ukui dalam timpuh 1 April tu tadi, dipinta datai berubat enggau lengkas ba klinik tauka sepital ke semak.
Orang mayuh mega dikeingatka ngambika seruran bejaga sereta nyeliahka diri ari kena ketup jelu lebih agi ukui.
Nyemaka diketup, enda tau enda jampat meresi bekau telih ke kena ketup ukui ngena sabun enggau ai beresi ke anyut pengelama 15 minit sereta udah nya enggau naka pengelengkas nganjung diri berubat ngagai klinik tauka sepital ke semak.