Pekebun lada diperansang ngemeranka chara organik
Chara nanam tu alternatif dikena nentuka lada ke ditanam nadai bekau kimia sepengudah rangkai
JULAU: Bala pekebun lada tau nguingka runding ngagai pengawa nanam lada enggau chara organik ketegal ti berega agi ari lada ke ditanam diatu.
Lada organik tu iya nya lada ke ditanam ti enda ngena rachun tauka sum ti bisi bekau kimia udah ke dirangkai. Datuk Joseph Salang Gandum Kaban Parlimen Julau
Kaban Parlimen (MP) Julau Datuk Joseph Salang Gandum madah, lada organik nyadi alternatif ngagai lada chelum enggau burak ti laku dipinta ba makit dunya.
“Lada organik tu iya nya lada ke ditanam ti enda ngena rachun tauka sum ti bisi bekau kimia udah ke dirangkai.
“Kelimpah ari nya, berengkah ari dikarang nyentuk ke dijembi lada organik tu diintu enggau chukup ngambika enda bechampur enggau utai bukai baka pasir, amau tauka kulit rangkai,” pia ku iya nerang.
Iya mantaika penemu nya maya ngulu pengerami betemu enggau rayat ba Rumah Enchana Ugak di Entaih, Entabai, hari Lima tu tadi.
Nangkan rumah panjai nya iya mega ngulu program ke sebaka di Rumah Sumping enggau Rumah Meru.
Nambahka jaku iya, Salang madah, nyema orang betanam lada ulih nanam lada enggau chara nya, dia lada menua Sarawak deka lebih agi dike- lala ba renggat antarabansa.
Bekenangka rega lada ti enda berega maya hari tu, iya minta orang betanam lada anang ngelengka kebun lada sida.
“Pia mega enti rega bisi niki anang beguai nyual abis tang nganti rega ke berega agi,” ku iya ngelalau.
Salang madah, nitihka rikod, dunya bekenaka lada 420,000 tan setaun alai ke naka ke diatu 360,000 tan udah bisi.
Kelimpah ari nya, iya ti mega bisi nanam lada kediri empu madah iya udah berandau enggau Opis Lada Malaysia iya ke diatu benung chakah mansik nambahka agi pengawa nanam lada.
“Sida benung mansik chara proses lada enggau manah agi kelimpah beratika kereban bukai ti ulih nganti kayu tebelian nyadika tuat lada ke diatu majak pedis digiga,” pia ku iya madah.
Maya ke berandau nya mega ku Salang, iya minta piak nya nagang orang ti ngambi lada ari Vietnam, Indonesia tauka China lalu diproses ditu digagaka nama Lada Sarawak.
“Ambika banding, di Vietnam sida nanam nyentukka ngarang lada semanjai taun enda nitihka musin ngulihka kualiti ke deka sida.
“Kitai enda nemu bakani chara sida nanam enggau ngarang lada.
“Enti lada nya dijual, ngena nama Lada Sarawak, pekara tu tau nejuka lada kitai ditu enda manah nama ba makit dunya,” ku Salang.