Seminar Ketuai Raban Bansa Iban dikena nerangka isu tanah NCR
KAPIT: Seminar Ketuai Raban Bansa Iban enggau Tuai Rumah udah meri mayuh penerang lalu tu beguna endar dikena naburka sekeda penerang ngagai bala ketuai ngambika sida mereti agi pasal daya pengidup enggau adat asal Iban kelebih agi ba pekara hak enggau pengelebih baka ti diaku perintah nengeri, pia ku jaku seiku ketuai raban bansa Iban, Temenggong Wilfred Billy Panyau.
“Seminar tu beguna endar ngagai bala ketuai raban bansa Iban dikena meretika isu kelebih agi bekaul enggau hak tanah adat bansa asal (NCR) baka Pulau Galau (PG) enggau Pemakai Menua (PM).
“Nyadi peranak ti diau di kandang menua pesisir, tanah nyadi reta pemadu berega,” ku Billy rambau pengawa bejadi nutup seminar dua hari berunggu ke diatur ba Hotel Meligai ke digulu urung 70 iku ketuai raban bansa ari Kapit enggau Pelilih Bukit Mabong.
“Bansa Iban bisi sistem sida empu ngatur pekara di rumah panjai lalu adat tu dipejalai ba semua sukut pekara rama.
“Seminar dua hari berunggu tu udah dikenataika seiku speaker ti ngembuan peneleba enggau mayuh penemu ba daya pengidup enggau adat asal kitai bansa.
“Aku ngarapka kita (pesereta) teulihka pemaik ari seminar tu dikena nambahka penemu kita sentang adat asal Iban. Pia mega, laban bilik aum enda ulih nampung pemayuh tubuh kitai, ke alai kitai enda ulih ngagauka tetiap iku tuai rumah.
“Dikearap penemu diulih ari seminar tu tau dikunsi enggau tuai rumah sereta nembiak redak ke bukai di rumah panjai kita. Penemu tu beguna endar, nya alai kitai meseti bekunsi enggau pangan diri kena ngintu peminta enggau nyaga daya idup enggau adat asal bansa kitai,” ku Billy.
Iya meri terima kasih ngagai Majlis Adat Istiadat Sarawak (MAIS) ke udah ngatur seminar nya di Kapit. Iya ngarapka seminar ke sama deka diatur di Pelilih Song laban dia bisi lebih ari 350 buah rumah panjai di Kapit enggau Pelilih Bukit Mabong.
Seminar dua hari mungkur pekara Adat Belaki Bebini, Sarak, Enggau Bebagi Barang dikenataika Sekretari MAIS, Salang Manjan.
Ku Salang Manjan dalam pejurai iya ti mungkur pekara Adat Belaki Bebini, Sarak, Enggau Bebagi Barang, ngaul pasal undang-undang ba adat tikah, penerang pasal penama (sistem elektronik adat tikah asal), adat bebagi reta orang sarak, belanja bini/anak, adat beiru anak enggau atur bebagi barang enggau anak iru.
Enchana Labau ti bejuraika Adat Pemati, Pemali Pendam, enggau Adat Bukai Nyengkaum – adat ngintu pemati, adat ulit enggau tebalu enggau adat nyengkubang pendam/ mindahka pendam.
Nangkan nya, Philip Igai Melina ngelansa silik pasal Adat Berumah, Pemali Rumah enggau Adat Pindah, Adat Bumai enggau Pemali Bukai.
Kesemua pesereta udah diberi setipikit penyereta.
Sekeda bala ke bisi datai Sekretari MAIS Salang Manjan, pengelicha Enchana Labau enggau Philip Igai Melina, Pemancha David Dian, Penghulu Sallang Batang, Penghulu Steward Sawing, Penghulu Jampi Rawing, sereta bala bukai.