Sibu seruran chakah ngemansangka produk dagang temuai
SIBU: Mengeri Sibu deka majak mansang enggau produk dagang temuai ti bela nyaup nyungkak agi dagang nya ba menua tu.
Kaban Kunsil Nengeri ( ADUN) Dudong Datuk Tiong Thai King madah, industri dagang temuai nyadi sebengkah ari sektor ti besai reti ngagai penyampau penatai pemisi.
“Di Sibu kitai bisi beberapa bengkah endur ke manah udah digaga tauka digaga manah agi baka pasar malam Sibu ke baru tu.
“Lalu seiti iya ke baru iya nya diatu, orang luar tauka temuai ari menua tasik tau meda endur ke manah ti digelar ‘Love Garden’ ba pasar Sungai Merah.
“Semua palan tu endang digaga ketegal kitai sama bela deka besaup nyungkakka agi dagang temuai menua diri lebih agi baka di Sibu ditu,” pia ku iya madah.
Iya bejaku munyi nya maya dipebasa datai bejadi projek ‘Lock The Love’ di pasar Sungai Merah ditu, kemari.
Projek nya digaga Junior Chamber International (JCI) Sibu beserimbai enggau nyambut penumbuh JCI Sibu Ke- 60 seraya ngintu pengerami gaga ke kaul JCI Sibu begulai enggau JCI ari menua bukai baka Korea, Taiwan, Hong Kong, Pelipin enggau Kota Kinabalu, Sabah.
Sama bela datai maya tu iya nya Presiden JCI Malaysia Nurul Huda Mohd Affandi, Chairperson Pengerami Nyambut Penumbuh JCI Sibu Ke-60 JCI Irene Pet, Chairman Alumni Dato Andrew Wong sereta bala bukai. Tiong ti mega Chairman Opis Kaunsil Sibu ( SMC) mega madah, pengawa ke di- gaga JCI Sibu nya ukai semina nambahka seiti agi palan ke manah alai nemuai di Sibu tang bela mandangka pengeransing diri ngemujurka Taun Nemuai Ke Sibu 2017.
“Kitai berasai temegah amat ati meda pengawa JCI Sibu tu.
“Kitai pechaya palan tu tau bendar matak pengerindu temuai menua luar tauka mensia mayuh menua tu empu,” ku iya madah baru.
Kelimpah ari nya, iya mega muji pengawa JCI ti nanggam kaul begulai enggau menua luar baka ke dirami sehari nya.
Ku iya, chara tu tau bendar ngelaku tauka mantaika mengeri Sibu ngagai orang menua bukai.
“Kitai bela nemu industri dagang temuai beguna amat ngagai menua tu kelimpah mai penguntung ngagai rayat ari chara nambahka penatai pemisi enggau awak gawa.
“Nya alai, nanggam kaul enggau menua bukai meseti bisi dikena ngemujurka dagang temuai,” pia ku iya madah.
Dulu agi ari nya, Maggie ba jaku iya madah, sida andal amat projek ke digaga nya ulih nyungkakka agi penyampau orang luar nemuai ke Sibu.
“Kami ngarapka ‘ Love Garden’ tu nyadi endur ke manah alai ngelantangka ati baka sida ke bujang dara tauka sida ke benung bepangan.
“Kami mega deka ngatur macham bengkah program ditu ila nyengkaum baka kimpin pemeresi ninting taun,” ku iya nerang.