S’wak enda ulih semina bepanggai ba asil kampung, patut bisi penatai bukai
KUCHING: Nengeri Sarawak enda ulih semina bepanggai ngagai asil kampung baka ari pengawa nebang kayu aja tang patut muka kebun sawit dandang besai dikena nambahka penatai pemisi menua tu.
Berebak enggau nya, Sarawak meseti berundingka chara ngangkatka ekonomi nengeri nengah pengawa dagang temuai, ku Kepala Menteri Datuk Amar Abang Johari Tun Openg.
Iya madahka, bepelasarka pemerat nya, agenda Perintah Sarawak deka ngangkatka penuduk industri dagang temuai di dalam sereta ngelingi menua Kuching.
“Kitai enda tau enda berundingka ekonomi menua tu nengah chara ngemeratka pemansang industri dagang temuai baka di menua bukai,” ku Abang Johari.
Iya madah munyi nya lebuh ba teks jaku iya ti dibacha Menteri Dagang Temuai, Seni, Main Asal Nembiak enggau Lumba, Datuk Abdul Karim Rahman Hamzah lebuh bejadika ‘ The Marian Boutique Lodging House’ ( semak enggau Rumah Bishop Gerija Katederal St Thomas), Wayang Street ditu, kemari.
Abang Johari meri terima kasih ngagai pengatur pengawa Marian Boutique Lodging House ke pengulih sereta ngeluarka belanja ke mayuh, dikena negemujurka projek tu.
“Tu seiti pengawa berani, ke setipak enggau agenda Perintah Nengeri dalam ngangkatka penuduk industri dagang temuai kelebih agi di Kuching,” ku iya.
Abang Johari ti mega nyadi Menteri Wang enggau Pengatur Ekonomi madahka, kemaya hari tu, udah nyadi trend ba sebagi ari Kuching lama, alai mayuh rumah tauka rumah kedai ke lama digaga baru, lalu ditukar nyadi palan makai, restoran enggau palan endur diau.
“Pemansang tu manah laban iya ngemendarka pesaka sereta rumah- rumah lama ke besejarah di Kuching, dijaga enggau manah, lalu dalam timpuh nya mega, meri penguntung ekonomi ngagai orang ke bempu rumah-rumah lama digaga maya jeman koloni kelia.
“Aku beterima kasih ngagai orang dagang ke meri ‘ nyawa baru’ sereta tuju pemerat ke baru ngagai rumah- rumah lama tu,” ku iya.
Ku iya, pemujur ngemanahka palan- palan lama digaga nyadi palan ke baru baka Pasar Siniawan nyadi palan makai lebuh lemai hari, patut meransang kitai, iya nya projek bansa tu bepeluang mujur.
“Enti ngarapka hotel aja, enda ulih mai mayuh temuai ngagai menua kitai, laban menua tu enda tau enda bisi palan ke matak ati temuai datai kitu.
“Kitai enda kurang ngembuan palan bansa tu, laban kitai mayuh endur ke memanah baka Muzium Sarawak, ke ditambah enggau Kampus Muzium Sarawak, Semnggok Wildlife Santuary, Kubah enggau Taman Negara Bako, nyengkaum Kuching Golden Bridge, sereta mayuh palan bukai,” ku iya.
Ba lansa bukai, iya madah, pengawa dagang temuai ke bepelasarka nyaga pengerai diatu udah nyadi sebagi ari pemerat ekonomi Kuching ( diatu Kuching bisi empat buat sepital peribit).
“Aku baru pulai raun seraya belajar ke Melbourne, Australia, lalu ari perati kami, bakani ku pelajar nya matak ati orang, kelebih agi rayat Malaysia ngagai menua nya, ngulihka pelajar.
“Kitai pan ulih ngaga bansa nya di Kuching, laban kitai mayuh universiti, baka UNIMAS, Swinburne, UiTM, UCSI enggau sekeda kolej ke diempu peribit enggau Perintah, sereta palan pemansang pengelandik,” ku iya seraya madah Kuching mega nyadi palan ke seruran dipilih alai ngatur aum besai.
Abang Johari ti mega nyadi Menteri Pemansang Nengeri enggau Pengeraja Asal madahka jeman diatu udah berubah, lalu baka nya mega chara kitai mutarka ekonomi kitai.
“Kitai enda ulih agi bepanggai ba ekonomi konvensional agi, enti kitai deka meda ekonomi kitai angkat manah agi.
“Kitai enda tau enda ngubah chara kitai setipak enggau jeman digital dalam tiap sukut ari sistem kitai, ekonomi ngagai pemungkal baka servis opis kunsil.
“Lalu baka nya mega enggau pampang dagang temuai kitai, sama enda diseliahka. Kitai enda tau enda ngubah chara kitai ngagai digital lebuh kitai ngaga promosyen, pakej sereta nyual produk dagang temuai. Kitai bedau laun ngubah chara kita, laban menua baka Australia pan baru berengkah ngemutarka ekonomi digital,” ku iya.
Kelimpah ari nya, Abang Johari mega meri terima kasih Archbishop Kuching, Most Reverend Archbishop, Datuk Bishop Bolly Lapok ke deka pinchin enda lama agi ( pinchin kena 10 Ogos 2017).
Sama bisi daai Menteri Kaunsil Kandang Menua enggau Pengawa Berumah, Datuk Dr Sim Kui Hian, Sapit Speaker Kunsil Nengeri Dato Gerawat Gala, Menteri Muda Nembiak enggau Lumba Snowdan Lawan, Presiden Serakup Indu Dayak Sarawa, Tan Sri Datuk Empiang Jabu, ADUN Layar Gerald Rentap Jabu, Kaban Eksekutif Opis Kunsil Dewan Bandaraya Kuching Utara (DBKU) Dato Wee Hong Seng, Archbishop Kuching, Most Reverend Archbishop, Datuk Bishop Bolly Lapok enggau Group Direktor The Marian Boutique Lodging House enggau The Ranee Boutique Suites, Rosemarie Wong.