Petros diempu Sarawak udah ditumbuh rasmi
Bala kaban komiti kompeni tu mega udah dichiri lalu sida ukai orang ke regas bepolitik
KUCHING: Penumbuh kompeni Minyak enggau Gis tauka Petros ke diempu Sarawak diatu udah rasmi, ku Kepala Menteri Datuk Amar Abang Johari Tun Openg.
Ba pengerami opis menteri ke diatur malam ensanus, Abang Johari madah semua pemesai kaban komiti ke diarika peranak Sarawak udah dichiri.
“Malam tu aku deka madah dia kitai udah rasmi bejadika penumbuh Kompeni Minyak enggau Gis Sarawak tauka Petros.
“Semua pemesai kaban komiti ke diarika peranak Sarawak udah dichiri. Semua sida tu ngarika raban profesional ke ngembuan mayuh peneleba ba pekara minyak enggau gis,” ku iya.
Abang Johari nambah semua pemesai nya ukai ari raban orang ke regas ba pengawa politik.
Tajapia, Abang Johari enda mantaika nama pemesai, chairman tauka CEO Petros ke udah dichiri
Ba pengerami nya Abang Johari disempulang bini, Datin Dato Jma’ani Tun Tuanku Bujang.
Petros ditumbuh ngambika Sarawak ulih ngambi bagi ba pengawa ke bekaul minyak enggau gis kelimpah ti mengkang minta bayar royalti 20 peratus ari Petronas.
Ba pengerami nya mega, Abang Johari bisi madah CEO ungkup Development Bank of Sarawak (DBOS) ke baru ditumbuh udah mega dichiri ke alai bank deka bejalaika operasyen ba awak ke semak.
Iya mega enda mansutka nama CEO DBOS ke udah dichiri.
Ku iya, semua pemesai ‘ board members’ DBOS ngarika raban profesional ke nadai kaul ba pengawa politik lalu deka betuaika chairman ke mega Sekretari Perintah Nengeri Tan Sri Datuk Amar Morshidi Abdul Ghani.
“Kitai udah nyiri CEO DBOS. CEO enggau tim iya deka dikemata Tan Sri Sekretari Perintah Nengeri,” ku iya.
Ngenang kaul bukai, iya madah Perintah Nengeri udah bejalaika tusun pengawa ke tau ngangkatka modal mensia.
Ku iya, tusun pengawa nya meri awak ngagai peranak Sarawak nampung pelajar ngagai ikas ke tinggi baika nya ba universiti dalam tauka luar nengeri.
Nitihka penerang ari Abang Johari, Yayasan Sarawak ke alai iya nyadi chairman deka nambah skularship enggau lun ngagai pelajar Sarawak.
“Aku udah minta Yayasan Sarawak meri skularship ngagai pelajar postgraduet, kelebih agi PhD.
Semua pemesai kaban komiti ke diarika peranak Sarawak udah dichiri. Semua sida tu ngarika raban profesional ke ngembuan mayuh peneleba ba pekara minyak enggau gis. Datuk Amar Abang Johari Tun Openg Kepala Menteri Sarawak
“Peluang belajar ba renggat PhD deka mai pemaik ba pekara pemansik ke alai pansik tu chukup beguna dikena kitai ngemansang pengeraja asal ke dikembuan,” ku iya.
Pengerami malam nya mega disempulang enggau pengerami ngintu hari pengada ke 67 taun Abang Johari (4 Ogos).
Bela datai Sapit Kepala Menteri Datuk Amar Awang Tengah Ali Hassan, Sekretari Perintah Nengeri Tan Sri Datuk Amar Morshidi Abdul Ghani, Menteri Bekal Ai enggau Karan Menua Pesisir Datuk Dr. Stephen Rundi Utom, Menteri Pemansang Pelajar, Sains enggau Pansik Teknologi Dato Sri Michael Manyin enggau menteri bukai.