PLF ba raban buta urup udah nyapai tikas ti ngemegah
SARIKEI: Pelajar Literasi Fungsian ( PLF) ba raban buta urup di menua tu udah nyapai tikas ti ngemegahka ati ke alai Opis Pemansang Mensia Mayuh (KEMAS) nyadi sebengkah ejensi perintah ti ngempu tanggungpengawa mantu raban tu abis nadai ulih nguasa 3M iya nya Macha, Nulis enggau Ngira.
Ketuai Direktor KEMAS Malaysia, Dato’ Amirruddin Ariffin madah kenyau ari opis tu ditumbuh 56 taun ke udah, bemacham pengawa udah dipejalai dikena mantu raban tu nguasa penemu 3M.
“Kenyau ari nya, opis udah beratika 98 peratus komuniti buta urup kelebih agi di menua pesisir di Semenanjung Malaysia (menua orang asal), Sabah enggau Sarawak udah mujur nguasa penemu tu, naka diatu.
“Tu seiti pemujur besai KEMAS nyeridi raban buta urup nguasa penemu macha, ngira enggau nulis kelimpah meri pelajar tumu nembiak mit nengah Tabika enggau Taska KEMAS ti berengkah diadaka taun 1970 an suba,” ku iya.
Iya mansutka jaku tu lebuh bejaku bejadika Pengawa Ngintu Hari Pengajar KEMAS Nengeri Sarawak di Balai Sental, Sarikei semak ditu, kemari.
Ku iya nampung, piak KEMAS nengah Opis Menteri Pemansang Menua Pesisir enggau Kandang Menua Malaysia (KKLW) nagit datai ba taun 2020 ila, kesemua komuniti buta urup di menua ulu menua tu ulih nguasa penemu 3M seratus peratus.
“Tu tagit besai piak kitai sebedau datai ba taun 2020, semua komuniti buta urup di menua ulu ulih nguasa penemu tu,” ku iya nerang.
Pemisi bala pengajar ti profesional datai ari pengajar Tabika KEMAS, Pengajar Kelas Pelajar Pengelandik Literasi Orang Besai Tuai ( LEADS), KEMAS ulih nyapai tagit tu datai ba taun 2020.
“Opis udah bisi pengajar ti udah dilatih mantu raban dituju iya ke diberi latih kgas sereta bala pengajar Tabika KEMAS mega udah diberi pelajar khas dalam bidang tu, piak opis pechaya, kitai ulih nyapai tagit tu ila,” ku iya nerang.
Nya alai ku iya, piak nya diatu nyauka nyapai tagit seratus peratus lalu diatu semina dua peratus aja tinggal sebedau datai ba taun 2020.
“Kitai deka meri pemerat ngagai pengawa nyapai tu lalu pekara pemadu beguna kesemua pesereta program patut diberi latih insentif berengkah ari renggat tumu dikena nyediaka diri nguasa penemu tu ila,” ku iya nyemetak.
Sama bisi datai, Pemangku Direktor KEMAS Sarawak Dayang Monalizawati Abang Ismail, Sapit Direktor KEMAS Sarawak Fatimah Rosli, Penulung Direktor Orang Gawa enggau Pengatur Pengawa Joseph Unsong, Penulung Direktor Pemansang Komuniti enggau Pelajar Pengelandik Langi Liban, Pemesai KEMAS Bagi Menua Sarikei, Syuaib Ahmad sereta Pemesai KEMAS Bagi Menua Sri Aman, Josipah Sabas.