Penanggul suntuk ai beresi ditapi Kpg Bulau, Mutap, Sinop patut diputar

MIRI: Peranak Kampung Bulau, Kampung Mutap enggau Kampung Sinop mengkang napi penanggul suntuk bekal ai beresi sereta jalai genturung pendiau ti bedau dibelakin.

Pemesai PAS Sarawak, Jofri Jaraiee madahka sida udah lama minta lalu bisi piak besemaya deka mantu tang dataika sehari tu lalu bedau dikeamat.

“Tebal agi peranak ti bisi dirandau madahka diri lebu laban udah suah pengawa bepilih dipejalai enggau semaya deka ngagihka belanja nyambung ai beresi.

“Tang nyentuk sehari tu, iya semina tinggal semaya aja lalu peranak ditu agi ngarapka bantu datai kitu baka ti kala disemaya,” ku iya kemari.

Sekeda genturung pendiau ti bedau ngembuan bekal ai beresi iya nya Kampung Mutap enggau Kampung Sinop.

Bala sida bekenaka pam ai dikena ngulihka ai ari sungai besemak sereta ngena ai ujan ungkup ai diguna ninting hari.

“Ai sungai keruh enggau enda beresi endang enda manahka pengerai lalu sida betapi enggau penanggul ngulihka ari beresi kelebih agi musim kemarau,” ku iya nerang.

Ba lansa ke bukai, chara pemadu semak napatka genturung pendiau nya nengah sungai, nepan bot injin sepit.

Maya betengahka jalai alun, pejalai jauh agi ari pasar Bekena, urung 45 minit pengelama, napatka genturung pendiau nya laban jalai batu sereta enda meruan nengah pintu tama ngagai kebun sawit.

PAS nganska perintah mekal ai beresi sereta mutarka jalai belakin ngagai genturung pendiau ti begunaka iya.

Berebak enggau nya, nyediaka penyikap perengka guna pemun enggau ngintu pengerai peranak ari terus bepanggai ba ai sungai ti enda manahka pengerai.