NGO patut kreatif ngiga chara nambahka belanja
Sekeda ari inisiatif nya baka ngeluarka dokumentasyen pengeraja asal dikena nambahka penatai belanja
KUCHING: Gempung ukai dikuasa perintah ( NGO) di nengeri tu patut kreatif dalam ngadaka aktiviti ukai semina pulaika pemaik ngagai komuniti, tang mega ulih nambahka penatai pemisi ngagai diri empu.
Menteri ba Opis Menteri Besai Datuk Joseph Entulu Belaun madahka sekeda ari inisiatif ti ulih dipejalai baka ngeluarka dokumentasyen pengeraja asal enggau main asal, ke alai tau nyadi pemansut belanja sereta ulih ngintu pengeraja asal raban bansa.
“Aku ngarapka NGO kitai ulih chakah sereta kreatif agi ngatur program dikena nambahka penatai belanja lalu ukai semina bepanggai ba perintah aja,” ku iya.
Iya mansutka jaku tu rambau Pengerami Begulai Enggau Ejensi Perintah enggau NGO di sebengkah hotel tebilang ditu, kemari.
Sama bisi datai Chairman Sarakup Indu Dayak Sarawak
Aku ngarapka NGO kitai ulih chakah sereta kreatif agi ngatur program dikena nambahka penatai belanja lalu ukai semina bepanggai ba perintah aja. Datuk Joseph Entulu Belaun Menteri ba Opis Menteri Besai
(SIDS) Tan Sri Dato Sri Empiang Jabu sereta bala pengari ari NGO bukai baka Gerempung Bansa Dayak Sarawak (SDNU), Serakup Graduet Dayak Sarawak (SDGA) enggau ke bukai.
Pengerami lemai nya mega berebak enggau pengawa ngelancharka projek bup resipi SIDS – ‘Sarawak Kitchen, Indigenous Flavours’.
Nitih ku Exco SIDS ke lalu nyadi penyelaras projek, Margaret Bedus, bup resipi tu ngerintai sepenyampau 100 bansa pemakai asal Dayak.
“Batang tuju projek tu deka ngumpul sereta ngintu pemakai asal Dayak ngambika meruan nyadi pemakai rebak kemaya hari.
“Kelimpah ari nya, dikena meri penyedar bekaul enggau nilai pemakai asal sereta bekunsika pemakai tu enggau komuniti bukai, lalu mandangka pengaya pesaka kulinari Dayak,” ku iya.
Beserimbai enggau pengerami nya, Entulu mega bisi nyuaka belanja bela penyampau RM10,000 ngagai SIDS enggau SDNU sereta RM5,000 agi ungkup NGO ke bukai.