Chee: Perengka guna ke dipenggi mensia mayuh patut dijaga manah
KABONG: Perengka guna mensia mayuh endang dipenggi begulai lalu iya patut dijaga enggau manah, pia ku Kaban Kunsil Nengeri ( ADUN) Kabong, Mohd Chee Kadir.
Ku iya, tikas penyedar komuniti ba pemesai guna ngintu enggau nyaga perengka guna mensia mayuh kemaya hari majak nadai, dataika tebal agi perengka guna dipenyati.
“Komuniti patut sedarka perintah udah ngagihka mayuh belanja nyediaka perengka guna tu ungkup guna semua piak.
“Nya alai, endang enda patut perengka guna tu dibasau pia aja, enggau ulah enda menuku sereta nadai tanggungpengawa, iya nya ngerusak iya.
“Penyedar pemesai reti pengawa nyaga perengka guna mensia mayuh patut ditegapka agi, nentuka perengka guna baka agu, padang, telefon enggau perengka guna ke bukai ulih dikena sereta diasaika begulai dataika belama iya,” ku iya.
Mohd Chee mansutka jaku tu rambau Pengawa Bejadika Projek- Projek Pemansang Pelilih Kabong, apin lama ke udah.
Berebak enggau nya, Chee mega ngelalau peranak dia ngintu semua perengka guna ke bisi disediaka perintah pulaika pemaik begulai.
“Perintah udah nyediaka perengka guna enggau belanja ti besai, nya alai intu enggau kena semua perengka guna naka pemanah.
“Terenakka dalam ati kitai semua angkunka perengka guna mensia mayuh.
“Anang ngerusak iya laban tu deka ngayanka pemabu runding kitai lalu tu deka ngayanka penimpang ulah komuniti kitai ditu,” ku iya.
Rambau atur pengawa nya, Mohd Chee mega bisi bejadika Padang Bol Mensia Mayuh Kabong ti beungkus RM798,500.
Padang nya berengkah digaga dalam taun 2014 lalu tembu dalam taun 2016.
Nangkan nya, Chee mega nyuaka kunchi rumah Program Perumahan Rakyat Termiskin ( PPRT) ngagai 12 iku penerima, tetiap rumah berega RM68,000.
Bela bisi dikemendar projek ngemanahka rumah ngagai 105 iku pesereta ti udah tembu digaga, bela beungkus RM11,000 sebuah.
Ba kededua projek nya ( projek PPRT enggau ngaga baru rumah) kesemua iya nelan belanja manggai RM2 .7 juta.
Pengawa ngaga sebuah taman nembiak mit bemain ari baruh Projek Transformasyen Menua Pesisir ( RTP) beungkus RM200,000 mega bisi dikemendar rambau atur pengawa nya, lalu deka berengkah digaga enda lama da agi.
Sama bisi datai Pemesai Pelilih Kabong, Kamaludin Haji Alkap.