MBM meransang mensia mayuh nguna plastik ke mudah luluh
MIRI: Pengawa bekenaka plastik jampat luluh ( biodegradable plastic) nyadi alternatif pemadu baru diguna Majlis Bandaraya Miri (MBM) dikena ngurangka pengawa nguna plastik ke bukai ti ngeruga pengelikun rampa menua.
Pengawa nambahka aditif penganchur plastik baka dmas, plastik bansa tu dipelaba ulih luluh dalam timpuh enam bulan dataika lima taun dibanding enggau plastik bansa bukai ti begunaka timpuh dataika 100 ngagai 500 taun endur luluh dalam tanah.
“Plastik ulih luluh tu nyadi alternatif sereta engkeman endar kena nyilih kambut plastik ti dikena kitai diatu. Kitai begunaka pengeran ari tetiap iku piak stakeholder nentuka pemujur juluk tu,” ku Datuk Bandar, Adam Yii pengudah pengawa meri penerang pasal plastik ulih luluh MBM kemari.
Pengawa tu udah digulu piak stakeholder datai ari pedagang palan besai bebelika barang, pendaja enggau pengeluar produk plastik ditu sereta environmentalist, ti dikenataika Menijar Besai, Reka Jaya Supplies enggau Resources Sdn Bhd, Edward CK Yong.
Ku Adam, pengawa ngena plastik ulih luluh sekeda ari tiga pekara dikemeratka MBM dikena nyaga enggau ngintu rampa menua sereta kimpin meri rampa gadung ngagai mengeri besai Miri.
Pekara kedua iya nya kimpin ‘ Katakan Tidak Kepada Beg Plastik’ ti udah dilanchar dalam taun 2009 berengkah enggau enda ngasuh bekenaka kambut plastik tetiap Hari Minggu.
Kimpin tu ditampung ngagai Hari Lima, Hari Enam enggau Hari Minggu dalam taun 2010 lalu kena 1 Mei 2010, kimpin dipejalai tetiap hari ngujungka Miri nyadi mengeri besai keterubah di menua tu bejalaika pengawa nya.
Nengah kimpin tu, penguna ti bebelika barang di palan bebelika barang besai dikaul dalam kimpin deka mayar 20 sen tetiap kambut plastik.
Tuju pengawa tu meransang sida ngena kambut ti enda ngeruga rampa menua tauka mai empu kambut diri maya meli barang.
“Pekara ketiga iya nya bejalaika pengawa pemer- esi. Ba pengawa tu, kitai patut mayar kus pemadu baruh iya nya rega ti patut dibayar kitai,” ku iya nerang.
Nitih ku Adam, taja pengawa bekenaka plastik ulih luluh ukai pemutar ke bendar tang enggau kerejasama semua piak deka mantu ngurangka penanggul rampa menua pangka ari pengawa kelalu mayuh bekenaka plastik.
Berindik ari nya, iya ngelalau kompeni ngeluar, nyual barang plastik ditu sereta pedagang palan bebelika barang nguji ngena produk plastik ulih luluh sereta ngelakuka pemaik iya ngagai penguna.
MBM ari baruh Komiti Tetap LA21 enggau Pemansang Komuniti deka ngatur randau penyedar enda likun ngena plastik ngagai komuniti, dikena meransang ngemeranka pengawa 3R (kitar semula) sereta sayauka rampa menua.