Sitak Sibu deka bebendar ngiga atlet ke ulih menang ba SUKSAR 2017
SIBU: Semua Gerempung Lumba enggau Main sitak tu ngembuan tanggungpengawa ke besai nentuka sapa bagi atlet ti ngarika sitak tengah bepekit ba Sukan Sarawak ( SUKSAR) 2017 ke deka diatur bulan Disember ti deka datai.
Residen Sibu Hii Chang Kee madah, tu nyengkaum bekempit enggau Kaunsil Lumba enggau Main Nengeri (MSN) berundingka chara ngaga latih ba gerempung diri.
“Lumba enggau main begunaka gerempung baka ngaga latih enggau pekit ti dikena nyidi atlet ke endang ngembuan pengelebih tau menang ngarika sitak tengah bepekit ba SUKSAR 2017 ila.
“Nya alai, gerempung tu megai tanggungpengawa meseti ngembuan pelin ke manah ba main enggau lumba ti dikemeratka sida,” pia ku iya madah.
Iya mantaika penemu tu maya bejadi Pengerami Nyuaka Perais Pekit Petanque Nembiak Sibu 2017 ke diatur Gerempung Main Petanque Sibu (PSPBS) ba Gelanggang Petanque Batalion 10 Kem PGA Lanang ditu, lemai kilah ensana.
Pengerami tu bela digulu Ketuai Zon Tengah MSN Gloria James Juat enggau Sapit Chairman Gerempung Main Petanque Sibu Khairol Arrifin.
Pekit nya diatur begulai PSPBS, Opis Residen eng- gau MSN.
Nambahka jaku iya, Hii madah, nangkan ke tu, maya tiap ujung minggu sitak tu deka ngatur pekit dikena milih atlet ba macham beng- kah main ke bisi diatur maya SUKSAR ila.
Tu ku iya, nyengkaum udah ngaga pekit ungkup raban orang timpang pendiau (OKU) empai lama tu tadi.
Berindik ari nya, iya minta gerempung ke bukai ulih bechuntoka Gerempung Main Petanque Sibu ngaga pekit ke diatur sehari nya ba tuju ti sebaka iya nya nyidi atlet ti nyulut.
Ba pekit tu, 80 iku penyereta ari sitak Sibu nyengkaum sekula primari enggau sekondri besemekih ngulihka gelar champian berengkah 5-6 Ogos tu tadi.
Pemutus mandangka Halim Tok Thong Liang ari SMK Rosli Dhoby dipadu champian ba kategori Lelaki Individu lalu ditangkan Muhammad Zahiruddin (PSPBS Junior) enggau Charles Luang Dan Daniel ( PGA Lanang) ba penuduk lumur dua enggau tiga.
Ba kategori Indu Individu, Clarrisa Endi July@ Billy (SMK Methodist) ngempu gelar champian lalu Nurairina Nasuha Asahari (PGA Lanang) ba penuduk lumur dua enggau Nur Hazeera Madehie (SMK Methodist) ngempu penuduk lumur tiga.
Tim PGA Lanang dipadu champian ba kategori Lelaki Double, SMK Rosli Dhoby ba penuduk lumur dua enggau Kelab Petanque Sibu Jaya ( KPSJ) ngempu penuduk lumur tiga.
Ba kategori Indu Double, tim Kolej Vokasional (KV) ngempu gelar champian ditangkan SMK Sibu Jaya ba penuduk lumur dua enggau SMK Methodist ba penuduk lumur tiga.
Gelar Champian Kategori Lelaki Triple diempu SMK Rosli Dhoby diarika Slvestian Boob, Muhd Farid Aiman enggau Zul Khairie Zaberi.
Sekula tu mega ngempu penuduk lumur dua ba kategori tu ti diarika Cornellius Noel Barran, Halim Tok Thong Liang enggau Nur Imaduddin Ibrahim.
Penuduk lumur tiga diempu Kolej Vokasional iya diarika Zulfadzli Zakeri, Farid Haikal enggau Mohd Iqhwan.
Kategori Indu Triple mandangka tim SMK Methodist sekali agi ngempu gelar champian ti diarika Nurafidah Fadzali, Chelsea Crescentia Anthony enggau Ivone Lucyana Richard.
Penuduk lumur dua diempu tim Kolej Vokasional diarika Victoria Emma Jack, Shirley Emmelya Rejuan enggau Jacqueline Nie Lenit.
SMK Methodist mega ngempu penuduk lumur tiga ti diarika Nur Dini Fikriyah, Nur Famina enggau Nur Azmiza Raimi.
Semua sida ke bulih gelar champian deka ngarika tim Sibu bepekit ba Renggat Zon Tengah ke diatur ba endur ke sebaka kena 27-28 Ogos tu.
Pekit nya bela deka digulu pemekit ari Mukah enggau Kapit dikena milih altet ngarika Zon Tengah bepekit ba SUKSAR ke diatur 14-17 Disember ti deka datai.