Pedagang patut disediaka pelasar alai mantai produk

Dikena nyungkak penatai pemisi, nambahka asil produk

BINTULU: Program baka ‘ karnival’ tauka aktiviti bukai sekeda ari pelasar pemadu manah dikena mantu orang dagang menua tu mantaika produk sida empu lalu seruran ulih nambahka asil produk ti dijual sida, ku Kaban Kunsil Nengeri (ADUN) Samalaju Majang Renggi.

Chara ke bansa tu nyengala mujur ke alai tetiap pesereta program deka ngambi bagi mantaika produk tauka pemansut sida empu sereta ulih ngenegapka orang dagang menua tu. Majang Renggi ADUN Samalaju

Ku iya, nengah program ke bansa nya ukai semina mantu ngelaku sereta nyual produk sida ba makit, tang sida ulih bekunsika penemu enggau pangan diri senentang baka ni nambahka pemansut ti mayuh agi sereta manah agi kualiti.

“Chara ke bansa tu nyengala mujur ke alai tetiap pesereta program deka ngambi bagi mantaika produk tauka pemansut sida empu sereta ulih ngenegapka orang dagang menua tu,” ku iya.

Iya mansutka jaku nya rambau bejadika ‘Showcase Merdeka Serakup Anak Vaie Bintulu’ (PAVB) 2017 ke diatur di Paragon Street Mall ditu, bedau lama.

Seraya madahka program ti diatur serakup nya semitan enggau jam iya, Majang ngarapka program ke bansa nya deka terus dipejalai dudi hari mantu mai asil dagang bala pedagang menua tu sereta servis mensia mayuh ti dibai ejensi tauka opis perintah.

Rambau program nya ti disereta urung 80 kaunter ejensi perintah sereta orang dagang menua tu nyediaka bemacham servis ngagai semua raban ke bisi datai ngulu program nya.

Dalam jaku dipansutka iya, iya meri puji enggau terima kasih ngagai PAVB laban udah ngatur program dikena meransang pengerembai dagang menua nya.

“Berebak enggau nya, program ke baka tu endang dikena ngenegapka agi semangat beserakup pupu bansa enggau jalai pengarap di Bagi Menua Bintulu kelimpah niupka agi semangat talukka menua ngagai peranak menua tu,” ku iya.

Nya alai ku iya, program ke bansa tu endang nyadi palan begelumu komuniti di Bintulu ditu, negutka agi tanggam kaum ti udah bisi kenyau ari suba.

Nyerumba program nya, Majang begulai enggau komiti pengatur sereta bala bukai bela bejalai ngabas tetiap kaunter ti dibuka sepemanjai program atur nya.

ADUN Murum, Kennedy Chukpai Ugun, Temenggong Datuk Barry Yek Siew Hui, Pemancha Dato Dr Francis Toh enggau Penghulu Drahman Kawi sekeda ari bala ke bisi datai.

NGABAS: Kennedy (tengah) enggau Majang (dua kanan) lebuhka bejalai ngabas kaunter ke dibuka sepemanjai program showcase.

TEGAPKA ORANG DAGANG BUMIPUTERA: Majang (lima kanan) begambar begulai enggau bala bukai pengudah tembu pengawa ngelanchar program Showcase Merdeka PAVB 2017.