Semua pengajar KEMAS Sarawak dikeandal bisi Diploma maya 2020
SARIKEI: Opis Pemansang Komuniti (KEMAS) Sarawak udah nagit 100 peratus Pengajar Tabika KEMAS ti ari baruh opis nya ngembuan Diploma ba taun 2020.
Pemangku Direktor KEMAS Sarawak Dayang Monalizawati Abang Ismail madah, naka ke diatu urung 59 peratus pengajar Tabika KEMAS di selampur Sarawak iya nya 1,038 iku pengajar ari baruh opis nya ngembuan tikas pelajar diploma.
“Kebukai iya nya 307 iku benung nyereta Kursus Dalam Cuti (KDC) enggau Gred S29 deka nembuka kus sida lalu graduet enggau bulih Diploma enda lama agi,” ku iya.
Iya madah munyi nya lebuh ti bejaku di Pengerami Ngintu Hari Pengajar KEMAS Nengeri Sarawak ti bepalan di Balai Sental, Sarikei ditu kemari.
Beserimbai enggau nya, Dayang Monalizawati madah KEMAS Sarawak nagit semua pengajar Tabika KEMAS di nengeri tu bisi ngembuan Diploma datai ba taun 2020.
“Tu iya nya tagit opis, nyema udah datai ba taun 2020 ila, semua pengajar kitai deka ngembuan diploma diri empu paling enda graduet ba Diploma dalam Pelajar Tumu Nembiak Mit,” ku iya madah enggau silik.
Iya madah, sepenyampau 1,540 buah kelas Tabika KEMAS enggau penyampau nembiak iya nya 21,164 iku nembiak mitudah ditumbuh di seluruh nengeri tu naka ke diatu.
“21,164 iku nembiak mit benung besekula di Tabika KEMAS lalu bisi 81 buah Taska ari baruh KEMAS udah ditumbuhka enggau penyampau 1,128 iku nembiak mit naka ke saritu,” ku iya nandu.
Berindik ari nya, Dayang Monalizawati mega udh madahka pengaga ati ngagai semua pengajar Tabika KEMAS di selampur nengeri tu laban enggau pemisi Tabika KEMAS tu mih menua kitai udah nerima gelar sebuah Palan Pelajar Tumu Nembiak Mit ti pemadu nyulut di renggat antarabansa.
Dulu agi ari nya, pengerami nya udah dipenyadi Ketuai Direktor KEMAS Malaysia Dato’ Amirruddin Arrifin.
Sama bisi datai ba pengerami nya Sapit Direktor KEMAS Sarawak Fatimah Rosli, Penulung Direktor Unit Orang Gawa enggau Pengatur Joseph Unsong, Penulung Direktor Pemansang Komuniti enggau Pelajar Pengelandik Langi Liban, Pemesai KEMAS Bagi Menua Sibu Syuaib Ahmad, Pemesai KEMAS Bagi Menua Sri Aman Josipah Sabas.