Gerija Methodist Tudan siru mantu bala nembiak ti nadai dokumen pengelala diri
MIRI: Urung seratus iku nembiak bala nembiak ti ari baruh jaga palan belajar ba Gerija Methodist Tudan ninting hari, bepuluh iku ari sida nya nadai dokumen pengelala enggau setipikit pengada.
“Ke bendar, sida nya tau dikumbai nadai menua laban nadai kad pengelala diri,” pia ku pastor ti mangku tangku pengawa nya, Reverend Nicholas Tan.
Tebal agi bala nembiak nya bansa Penan ti datai jauh ari menua pesisir di Sarawak tauka asil ari tikah champur entara peranak Malaysia enggau menua tasik.
“Dalam kes bala anak Penan tu, siad ada ba rumah ti jauh di menua pesisir, lalu apai indai sida nadai penemu pasal ngerejista anak dalam timpuh dua minggu pengudah diada enggau proses ngaga surat pengada.
“Tebal agi bala apai indai nembiak tu enda nemu chara, sida enda nemu pemesai reti dokumen nya digaga ba maya ke ditetap,” ku Tan madah ngagai The Borneo Post lebuh ke diinterbiu bedau lama udah.
Ngagai bala nembiak ti diada asil jadi enggau peranak menua bukai, siku ari apai indai nembiak nya peranak Indonesia lalu siku ari peranak menua bukai, lalu sida jadi melaki bini nitihka adat asal ti besaksika tuai rumah, nadai setipikit tikah dikena nyukung anak ti diada nya anak sida. Ngasuh pekara tu majak mar, apai indai nya mega nadai dokumen pengelalai ti meruan baka MyKad. Tu ngasuh kes ke baka tu majak mar.
Enti nadai dokumen ke meruan, mar anak sida deka besekula nitihka maya umur ti patut.
“Sebedau kami ngambi sida kitu (palan belajar tu), sida sesegau nadai tuju di sebelah Tudan ditu. Nya kebuah kami ngambi sida kitu, meri sida peluang belajar macha enggau nulis,” ku Tan.
Sekumbang ke nganti bantu bukai, gerija ngereja tu ngatika diri, mantu sida minta ngerejista setipikit pengada enggau tingki (MyKad).
“Pemar keterubah iya nya ngiga Tuai rumah enggau bidan nyadi saksi ke apai indai nembiak ti ngempu anak nya.
“Baka ngelama tu, Tuai rumah mih orang ti ngatur pengawa jadi melaki bini di menua tauka rumah panjai sida. Bidan mega mantu indai ngadaka anak, lalu seduai tu mih ke tau nyadi saksi.”
Ngangauka sida ngambika datai ngagai Opis Pengerejista Bansa nya sebengkah agi pemar, ku Tan seraya madahka nganti pengelama bebulanbulan baru ulih ngempuruka saksi datai ngagai opis ngambika meri penerang silik pasal pengada anak enggau apai indai.
“Kami nadai pilih bukai, ngiga sida laban ked nya bepanggai ba penerang ari sida.”
Siti agi pemar ku iya, nganjung apai indai enggau anak beperesa Deoxyribonucleic acid test ( DNA), dikena ngenukuka nembiak nya endang anak sida.
“Peresa beguna RM1,500 ungkup apai indai - anak, reti nya kededua apai indai nya begunaka RM3,000.”
Naka ke diatu, gerija udah mujur mantu lapan iku nembiak ngulihka setipikit pengada ngambika sida ulih besekula.
“Sida enggau bisi lunggar umur masuk primari satu laban ukai semua sekula perintah deka nerima nembiak besekula ke udah lunggar umur. Taja pia, berasai gaga endar ati laban ulih mantu nembiak ke lunggar umur nengah suarat ke digaga kami ke dituju ngagai sekula,” ku Tan.
Timpuh, mega nyadi pemar ke besai, ku iya.
“Lama pemutus nganti pemendar ari opis pengerejista bansa pengudah semua dokumen dianjung, iya nya lebih setaun, lalu baka nya mega duit ti dikena mayar peresa DNA.
“Kami begagai enggau jam. Nya alai kami bisi nguji ngulihka bantu belanja. Enti enda mujur, kamai nadai pilih bukai tang ngapil ngambika ulih ngean belanja ari gerija, ke alai belanja nya bisi tatak.”
Tan mega mantaika pengirau ati laban sekeda ari nembiak nya udah enggau sida pengelama tiga taun tauka lebih ari nya.
“Nyema bisi sebarang pengelubah ba proses, pengidup nembiak nya jemah ila deka tepagang. Kami enggai meda sida bekedayau nadai pelajar lalu kami mega gaga ati ngelaluka semua bantu ti diberi,” ku iya.
Ngagai nembiak ti udah mujur diterima masuk sekula, gerija deka majak mantu ruang bilik sia baka mantu mayar yuran, meli bup enggau perengka pengangkut.
“Dikena ngelempungka tating, kami diatu nguji minta insentif ari opis pengintu pengelantang pendiau ngambik a mayar tambang perengka pengangkut nembiak ke seranta. Kegal rumah jauh sereta suntuk, bala apai enda tebayarka tambang bas ti ngujungka sida bedarat jauh nurun ke sekula. Kami bisi penyinu meda sida jauh bedarat, nya alai kami nyaup sida mayar tambang bas.”
Tan pechaya semina nengah pelajar aja ulih ngubah gaya pengidup nembiak enggau sida sebilik jemah ila ngambika manah agi.
Nya alai, pengawa mantu nembiak tu ngulihka dokumen ke sah beguna amat.
Penerang ke silik bekaul nembiak ke seranta tu tau dituju ngagai Rev. Nicholas Tan nengah lumur 019 854 8175.
Sesapa ke bisi ati deka meri bantu ari sukut mata duit tau ngemasukka duit nya ngagai akaun Gerija Methodist Tudan Miri 2 nengah lumur (PBB A/C: 318- 622-2701).