Mayuh program bantu dilangkar perintah ungkup peranak Sarawak
Dikena ngangkatka tikas pelajar nembiak sekula ti kurang penatai pemisi
BINTULU: Program meri voucher bantu uniform sekula iya nya entara pengawa ti digaga perintah dikena mantu tauka nyaup nembiak sekula ti asal ari ruang bilik ke kurang penatai pemisi sereta begunaka uniform sekula ti menyana baka nembiak sekula ke bukai, pia ku jaku Kaban Kunsil Nengeri (ADUN) Samalaju Majang Renggi.
Ku iya, program bantu ke digaga Yayasan Sarawak endang engkeman laban tu seriris enggau juluk perintah ti deka ngangkatka tikas pelajar peranak di nengeri tu kelebih agi sida ti diau di kandang menua pesisir.
“Nengah bantu ke diberi, tu mega ulih meri pengelantang ngagai nembiak sekula seraya meransang sida (ti kurang penatai pemisi) nyambung pelajar laban ngembuan uni- form ti menyana dikena,” ku iya.
Iya madah munyi nya lebuh bejaku ba Pengerami Nyuaka Voucher Bantu Uniform Sekula ke digaga di Sekula Primari (SK) Tanjung Batu ditu, kemari.
Ba pengerami nya, bisi 102 iku nembiak sekula ari dua buah sekula sekondari, tiga buah sekula primari China enggau 11 buah sekula primari datai nerima voucher bantu sida.
Ba jaku iya, Majang ngarapka bantu ke diberi perintah nya dikearap ulih meransang bala nembiak sekula ngambika alu belajar bebendar dalam pelajar dikena sida ngulihka penyulut dalam akademik jemah ila.
Ku iya, patut dikingat mega pelajar iya nya pun ngagai penyulut seiku nembiak sekula laban nengah pelajar aja ti ulih ngubah idup sida ngambika ulih besemekih dalam semua bidang ke bisi diatu.
“Berindik ari nya, aku ngarapka apai indai seruran mikirka chara ti manah dikena meli bup malin ti pemadu manah ungkup bala anak sida ti benung besekula kelimpah ari bup sereta pelajar ke disediaka sekula,” ku iya nambah.
Temuai dipebasa ke bisi datai maya nya Sapit Residen Bagi Menua Bintulu Hajah Hamdiah Bakir, Pemesai Pelilih Bintulu Mataip Sayu enggau Sekretari Politik Kepala Menteri Edwin Banta.
Nengah bantu ke diberi, tu mega ulih meri pengelantang ngagai nembiak sekula seraya meransang sida (ti kurang penatai pemisi) nyambung pelajar laban ngembuan uniform ti menyana dikena. Majang Renggi ADUN Samalaju