Kompleks DUN Lama deka nyadi palan pengawa seni, main asal
KUCHING: Kompleks Kunsil Nengeri (DUN) Lama kediatu diperambu deka nyadi palan teater sereta pengawa seni bukai.
Pekara tu udah ditukuka Kepala Menteri Datuk Amar Abang Johari Tun Openg lalu madah bisi konsultan udah diberi peluang ngelangkar gaya kompleks nya ke deka diubah nyadi palan seni ke baka sekeda palan seni di Singapore enggau di Kuala Lumpur (Istana Budaya).
“Konsultan deka meri langkar sida bakani gaya palan seni nya digaga ila, ke ulih alai komuniti kitai ti ngembuan pengelandik dalam seni mantaika pengelandik sida ba palan nya. Tu mega nyengkaum palan nya tau nyadi palan endur nembiak belajarka seni,” ku Abang Johari lalu nadu baru madahka palan nya ila deka dijaga ari baruh Opis Menteri Dagang Temuai, Main Asal, Seni, Nembiak, Lumba enggau Main
Iya madah munyi nya lebuh dikerandau pengarang berita pengudah bejadika ‘International Conferences on Language Studies 2017’ ti diatur Universiti Malaysia Sarawak (UNIMAS) di sebuah hotel ditu, kemari.
Kompleks Seni nya ke disadang tembu dalam kan- dang berapa taun tu ila deka disediaka enggau panggau ke moden, sereta perengka guna bukai ke deka digaga enggau gaya ke moden mega nyengkaum penuduk mensia mayuh deka digaga nitihka gaya orang meda teater.
Pemisi palan seni nya ila, ku iya, ngemuntangka temuai ari menua luar, lebuh sida ngelawa mengeri tu, bejalai nengah jematan ‘Golden Bridge’ (benung digaga diatu di Waterfront Kuching), lalu ulih ngagai Kompleks Seni nya, ke deka ngelaluka bala temuai enggau main asal, ajat komuniti di menua tu, kelimpah ari pengawa seni bukai.
“Palan tu nyauka baka Palan Main Asal Sarawak (SCV) tang manah agi ari nya,” ku iya.
Kompleks Kunsil Nengeri (Lama) kediatu, agi mengkang dikena endur pengawa makai lemai, program ngabang maya hari besai sereta program komuniti, kelimpah ari bisi sekeda opis ejensi perintah ba kompleks nya.
Kompleks Kunsil Nengeri ke baru iya nya diungkupka kena Aum Kunsil Nengeri aja kelimpah ari Dewan Santapan di kompleks baru, endur ngenahka tuai pemesai menua tu sereta ari menua luar makai.