Program ‘Merdeka Fun Run enggau Fun Ride’ nerima sambut ke manah
BINTULU: Nyauka 1,000 pesereta ari dalam enggau luar Bintulu nyengkaum ari menua Brunei Darussalam nyerta ‘Merdeka Fun Run enggau Fun Ride’ beserimbai enggau pengerami ngintu Hari Meredika Renggat Nengeri Sarawak bedau lama udah, ke alai pengawa ngelengka pesereta berengkah ba Piazza Naim Bintulu Paragon Street Mall.
Dulu ari nya, pesereta enggau senamrobik ke alai pengawa ngelengkaka pesereta udah dikemujur Menteri ba Opis Kepala Menteri (Integriti denggau Ombudsman), Datuk Talib Zulpilip pukul 8.30 malam Hari Enam (5 Ogos).
Sama bisi datai Residen Bagi Menua Bintulu, Muhamad Yakup Kari; Sapit iya, Hamdiah Bakir; D.O Bintulu, Mataip Sayu; Presiden Gerempung Anaq Vaie Bintulu (PAVB), Pandi Suhaili; Angelyn Kho ngarika Naim Land Sdn Bhd enggau bala komiti PAVB.
Meredika Fun Run mungkur pengawa belanda sepenyauh 5 kilometer (km) lalu Fun Ride nya ngayuhka ensikal sepenyauh 25 km nengah sekeda jalai di pasar Bintulu sebedau mulaika diri baru ngagai adan.
Program ke diatur PAVB nya ku Pandi, nerima sambutke manah kelebih agi ari kaban gerempung anaq vaie enggau juluk nyerakup pupu bansa di Bintulu ngambika ulih ngemujur program meredika lalu nyadika kelia nimbal pinta perintah ti deka ngemeranka lumba enggau main ungkup semua.
Program nya bisi kerejasama ari Opis Pelilih Bintulu sereta disukung Kelab Ensikal Jepak, Naim Land Sdn Bhd sereta Opis Nembiak Lumba enggau Main Bagi Menua Bintulu beserimbai enggau pengerami ngintu Hari Meredika Renggat Nengeri Sarawak bepalan di Bintulu.
Berebak enggau nya, Sekretari Besai PAVB, Ismawi Ishak meri terima kasih nga- gai pesereta ti udah nyereta sereta ngemujurka program ke diatur PAVB nya.
Berebak enggau nya, Fun Ride ke sepenyauh 25 km ti disereta urung 200 iku pe- sereta udah dilepaska Mataip enggau Temenggung Datuk Barry Yek sereta Pandi seraya dikemataka Pemancha Datuk Dr Francis Toh enggau Ketuai Raban Bansa Abu Bakar Abd Razak urung pukul 7.30 pagi Hari Minggu ba palan ke sama.