Subeng pechayaka diri bisi sukung ke tegap nyadi chalun BN di Saratok

KUCHING: Pengarap besai ari raban bansa ngagai Parti Demokratik Progresif (PDP) di Saratok udah ngenegapka agi parti nya ulih ngarika Barisan Nasional (BN) ba Pengawa bepilih Besai (PRU) ke deka datai.

Siku orang ti ngelakuka diri deka ngarika PDP Parlimen Saratok Subeng Muda, madah nya ulih disimpulka iya bepelasarka asil penemuai, program bekelala ke dipejalaika iya enggau bala raban nya.

Iya madahka udah sedia ngereja pengawa politik sereta udah bisi misyen enggau visyen ke nyengenda ti deka dipejalaika.

“Asil ari pansik sereta perati orang ke megai tanggungpengawa beratika gaya politik di Saratok, pejalai aku endang tampak sereta bisi pengarap ari genap raban bansa di Saratok sereta sukung penuh ari ketuai parti.

“Ketegal ari pengangkun diri ke deka nyungkak tikas pendiau rayat Saratok sereta sukung ti ukai semina renggat baruh tang mega bisi pengarap diberi ketuai parti, nya kebuah aku nurun ke Saratok ngabas penemu rayat,” ku iya madah ngagai Utusan Borneo apin lama.

Subeng apin lama bisi nemuai sereta ngatur Program Berandau Enggau Rayat ba Rh Ayom, Ng Luau, Awik Saratok sereta bisi digulu peranak menua ngelingi Nanga Luau, Kamidan, Itop sereta Malong.

Nambahka nya Subeng madahka pengarap enggau sukung ari ruang bilik iya empu mega ngering tauka ngenegapka runding iya deka nyadi pengari rayat di Saratok.

Berebak enggau atur program berandau enggau rayat nya, iya bisi nyuaka pemeri ngagai Komiti Pemansang enggau Pengelikun Genturung Pendiau ( JKKK) Rh Ayom, ngambika bisi dikena ngatur pengawa.

Kelimpah ari nya, nitih ku Ketuai nembiak PDP N39 Krian ke mega Penyelaras Program, Cr. Jeffery Jimbun, orang ti ngelakuka diri deka ngarika PDP Parlimen Saratok nya endang patut nyadi chalun BN ba sitak nya.

Ku Jeffery, Subeng endang peranak menua Saratok lalu nya senipak bendar enggau peneka sereta sebana rayat di Saratok ngelama tu ti keranka pengari rayat asal ari menua nya empu.

Subeng, 53, ukai semina regas, ngembuan ulah ngemaruhka diri sereta deka mending enggau nguna penemu bala mayuh aja tang mega ngembuan penemu enggau pengelandik ke ulih ngempung rayat, ku iya.

Nitihku Jeffery, Subeng bisi peneleba 32 taun dalam industri minyak enggau gis ba mayuh bengkah menua, nyengkaum menua tasik.

“Ba penemu aku, tanggungpengawa nyadi pengari rayat diatu enda baka dulu kelia. Diatu enti pengari nya enda nitihka singkang pemansang lalu ngatur pengawa ngena penemu lama, mayuh pekara ke enda ulih diputarka enggau likun.

“Bekaul enggau Subeng, peneleba iya dalam industri minyak enggau gis endang engkeman bendar dikena iya ngatur pendiau sereta pemansang di Saratok,” ku iya madah ngagai Utusan Borneo.

Sepenemu enggau Jeffery, dua iku Kaban Kaunsil Besai PDP Sarawak Hilary Mawan enggau Sebastian Janting ti madahka diri arap bendar ati ngagai Subeng ulih nyadi pengari rayat beduduk ari ke mayuh peneleba.

Ku Hilary, maya aum Kaban Kaunsil Besai apin lama, PDP mantaika dua iku nama ke deka dianjung ngagai Kepala Menteri lalu Subeng seiku ari nya ke bisi peneleba gawa endang kearapka ulih nyadi pengari rayat.

Nambahka nya Subeng dikearapka ulih matak pemansang sereta nyungkak tikas pendiau rayat di Saratok, ku Sebastian.