Pasar Kapit deka richah ujung minggu tu
KAPIT: Kapit udah sedia deka ngatur Pesta Kapit, Pemansang Dagang, Karnival Penguna enggau Anugerah Carta Siapa Juara (ACSJ) ke deka diatur belabuh ari 11 nyentuk 20 Ogos ba Padang Bilun Lama Kapit.
Semina sekda program aja diatur ba Pasar Kapit enggau waterfront Kapit ke deka endur ngatur pekit lumba bot laju.
Sapit Residen Kapit, Galong Luang madah pengerami bejadi Pesta Kapit, Pemansang Dagang, Karnival enggau ACSJ diatur kena lemai Hari Enam, 12 Ogos ti deka dipenyadika Sapit Menteri Pemansang Menua Pesisir enggau Kandang Menua, Datuk Alexander Nanta Linggi lalu pengawa nutup pengerami nya kena 20 Ogos deka dipenyadi Sapit Kepala Menteri, Tan Sri Datuk Amar Dr. James Jemut Masing.
Maya hari bejadi pengerami Pesta Kapit kena 11 Ogos, Melissa Francis deka merindang mensia mayuh.
Ba hari kedua (12 Ogos) sekeda aktiviti bukai baka Kapit Iron Man enggau Pekit Nginti sereta beperindang enggau artis Florence Lo.
Kena 13 Ogos bisi diatur pengawa nisih pemekit ungkup Pekit Pemajik Gamal Pesta Kapit ti ditangkanka beperindang enggau artis Sima Tawil.
Kena 14 Ogos bisi diatur pengawa nisih pemekit un- gkup Pekit Ngajat Beraban ti ditangkanka beperindang enggau artis Angela Lata Jua.
Pengawa nisih pemekit ungkup Pekit Kapit Idol enggau atur kus ngaga asil pengelandik jari (nusuk marik enggau nenun) dipejalaika ba Q-Centre ringkat 8 Opis Komplek Nengeri diatur kena 15 Ogos, ke alai malam nya mega artis Julita James bisi merindang.
Linda deka merindang mensia mayuh ba renggat final Kapit Idol ke diatur kena 16 Ogos.
Pekit nyurang ungkup nembiak mit, pekit nyumai pemakai ti manah ke pengerai, ‘ Interaktif Pengguna Bijak’ enggau renggat Pekit Ngajat Beraban diaur kena 17, lalu artis lelaki Iban tebilang, Ricky El deka merindang maya nya.
ACSJ IV sebagi ari pengerami besai ke diatur beserimbai enggau Kapit Fest ti dipejalaika kena 18 Ogos.
Artis ke bisi merindang kena 19 Ogos iya nya Zamery Amera, Gabriel Fairuz Luois enggau Raban Tembawai Kanyuk, Bunyau seduai Mujap.
Aktiviti ke diatur ba hari ke penudi iya nya Pekit Lumba Bot Laju ( ba Waterfront Kapit), pekit Ai Tuak enggau renggat final Pekit Pemajik Gamal Pesta Kapit Artis ke deka merindang lemai nya iya nya Rickie Anderson.